Et fillt ee sech wéi e Kand, wann een nees um Trampolin spréngt. Natierlech huet dat Trampolinsprangen näischt sou richteg mam Sprangen a Sprangschlässer ze dinn, wou een e bëssi erëm hopst. Beim richtegen Trampolinsprange kënnt et dach zu engem richtege Workout fir de ganze Kierper. An och hei gëllt: ''Übung macht den Meister''

19/03/2019 Trampolinsprangen ass IN

Et gëtt net méi just gedanzt oder gesongen an den Televisiounsshowen, mä och gesprongen. Trampolinsprange fir präzis ze sinn, Big Bounce op RTL hat et virgemaach. Wat sou einfach ausgesäit, ass dach e fermen Effort.
Ma et fillt ee sech wéi e Kand, wann een nees um Trampolin spréngt. Natierlech huet dat Trampolinsprangen näischt sou richteg mam Sprangen a Sprangschlässer ze dinn, wou een e bëssi erëm hopst.
Beim richtegen Trampolinsprangen kënnt et dach zu engem richtegen Workout fir de ganze Kierper. An och hei gëllt: ''Übung macht den Meister''.
Eng 400 Muskele komme beim Sprangen an d'Spill. Experte roden 2 bis 3 mol an der Woch 10-20 Minutten fir Muskelen, Sehnen a Bänner ze trainéieren, den Häerz-Kreeslaf-System ze stäerken an d'Gläichgewiicht an d'Koordinatioun ze verbesseren.
Spréngt ee méi laang wéi 20 Minutten, da klappt dat och mat der Fettverbrennung.
Orthopedesch Boboe beim Trampolinsprange géifen et seele ginn,  seet den Sport-Expert vun der däitscher AOK. Besser souguer, et kéint ee gutt op der Preventioun schaffen, ënner anerem duerch dat Hin- an Hirschwénge géife Verspanungen a Réckewéi reduzéiert ginn.

Natierlech sollt ee beim Kaf vun engem Trampolin gutt oppassen, dofir kucken op e zertifiéiert ass an eng gutt Randpolsterung huet. Uecht gi beim Benotzergewiicht, déi soll mat ärem Kierpergewiicht iwwertenee stëmmen, fir dass den Trampolin déi optimal Réckspronggeschaften huet. Dofir ass de Spilltrampolin vun äre Kanner am Gaart net gëeegent fir do elo är Sprangunitéiten ze maachen. Am beschten loosst Dir Iech do vum Expert an de Sportsbutteker beroden.
Entretemps kann een och schonns zu Lëtzebuerg bei sougenannte Jumping-Course matmaachen, fir a Form ze kommen. Déi Adresse fannt Dir am world wide web.

Ir een ufänkt mat sprangen, soll ee sech opwiermen an och sech beim Sprangen net iwwerschätzen. Lues ufänken, sech preparéieren an net vergiesse Pausen anzeleeën. Mä dat wäert Dir schonns selwer mierken an déi Paus vu selwe maachen.

An net vergiessen, wat ee méi héich spréngt, wat den Opprall méi staark ass. An dat kann d'Achillessehn dach belaaschten.

Op Trampolinsprange sollte verzichten: All déi Dammen, déi an aneren Ëmstänn sinn, wie Problemer mam Réck oder der Wierbelsail huet. Och wie schonns mol seng Bänner am Knéi oder Fouss iwwerdeent hat, sollt d'Fangeren dovunner loossen