Den 13. Oktober 2019 ass den éischte Mënsch offiziell ënnert 2 Stonnen e Marathon gelaf. De Kenianer hat fir déi 42,195 Kilometer zu Wien 1 Stonn, 59 Minutten a 40 Sekonne gebraucht. Domadder war déi Disziplin, déi vu ville Leefer respektéiert gëtt, nees an aller Mond! Vill probéiere sech un dëser Distanz, mol méi séier, mol méi lues. Wëssenswäertes an e puer Tipps fir all Marathoni huet d'Marie Gales zesumme gesicht.

21/10/2019 E Marathon lafen!

Am Fong ass de mënschleche Kierper fir laang Distanzen dach gutt konzipéiert, mä 42 Kilometer sinn der dach awer vill a Muskelen a Stoffwiessel schaffen do um Limitt. Gutt wier et och wann ee vill trainéiert huet, sech beim Start e bëssi waarm ze lafen. Dehnen soll een éischter net, dat spaant d'Muskelen un an d'Leeschtung géif liicht reduzéiert ginn. Interessant fir all déi, déi op Zäit lafen.

Sidd dir gestart, da fänkt äert Häerz méi séier u mat schloen an den Otemvolume geet an d'Luucht. Vun Ufank u sinn d'Muskelen am Asaz a fir déi nächst Stonnen op vill Energie ugewisen. Fir d'éischt gräift de Kierper op d'Energie aus Kuelenhydrater, also Zocker zréck.
Ma och d'Fetter am Kierper kommen drun, et ass falsch ze denken, dass Fetter eréischt no enger gewëssener Zäit oder Distanz verbrannt ginn. Ma d'Verhältnis hänkt vun der Intensitéit an dem Trainingslevel of an och vun de Reserve vun de Kuelenhydrater.

Iergendwann beim Marathon no 30 Kilometer gëtt méi Fett verschafft, well d'Kuelenhydrater opgebraucht sinn. Immens gutt trainéiert Leefer verbrennen awer manner Fett wéi den Otto-Normalleefer.

Kee Mënsch leeft iwwer Nuecht einfach mol sou e Marathon. 3-6 Méint Preparatioun ass fir Mënschen, déi schonns lafen, ze recommandéieren. Mä fir Leit, déi nach ni gelaf sinn, solle sech e Marathon-Niveau iwwert en Zäitraum vun zwee bis dräi Joer untrainéieren.  3-5 Trainingsunitéite pro Woch sollen hëllefen, déi néideg Konditioun opzebauen a kierperlech robust ze ginn. Ufänger an och eeler Leit sollte sech am beschten och medezinesch checke loossen.

Iessen an Drénken kuerz vum Marathon? Gäre ginn déi Pasta-Party virum Marathon organiséiert fir de Späicher vun de Kuelenhydrater vun de Muskelen nach emol ze fëllen. Och schlofe soll ee genuch, a kuerz virum Start net ze vill iessen, mat vollem Mo leeft sech schlecht.

Drénken ass liewenswichteg, well Stoffwiessel a Muskelen hëtzen op. Domadder geet d'Kierpertemperatur an d'Luucht an de Kierper schweesst bis zu 1,2 Liter Flëssegkeet pro Stonn eraus. Do kommen e puer Liter zesummen, déi een awer net virum Start kann drénken.

Och net just Waasser soll et sinn, well domadder verdënnt ee säin Natrium am Blutt an dat kann zu enger Hyponatriämie féieren. Dofir pro Stonn 300-400 Milliliter drénken, am beschten Flëssegkeet mat Elektrolytten fir dass de Kierper Zocker a Salz kritt.

Am beschte keng Experimenter beim Lafe maachen, näischt iessen oder drénke wat een net kennt.

42 Kilometer sinn net Ohne, 3 Kilo verléiert een dobäi, virum allem vill Waasser. An et kéim een och 1,6 Zentimeter méi kleng an d'Zil.

Nom Lafe sollen nees genuch Kuelenhydrater a Proteinne giess ginn a genuch gedronk. 48 Stonne Rou an da soll ee sech liicht beweegen. Och den Immunsystem sollt ee e bëssi schounen. An da wier dat Schlëmmst eriwwer!