Aus dem Joanne K. Rowling hirer Fieder oder besser gesot hirer Fantasie ass viru méi wéi 20 Joer den Harry Potter entstanen. D'Geschicht vum jonken Zauberer huet si zu enger vun deene bis haut räichsten a bekanntste Schrëftstellerinne gemaach. Elo bréngt si e neit Kannerbuch eraus. Wéi eent dat ass, weess d'Lea Schwartz.

28052020 Neit Buch vum J.K. Rowling

D'Joanne K Rowling hëlt hir Lieser eng Kéier méi an eng nei Welt mat, déi si selwer erschaffen huet. Dës Kéier geet den Ausfluch awer net an déi berüümten Zauberschoul Hogwarts mee an d'Kinnekräich Cornucopia. An der Geschicht geet et ëm d'Monster Ickabog. Dat der Legend no gäre Schof klaut a frësst, heiansdo och Mënschen an am allerléifste Kanner verschléngt. Domadder suergt et am Kinnekräich fir vill Angscht. Et gëtt awer och e méi déiwe Message an der Geschicht. Am Kannerbuch geet et och ëm d'Wourecht an de Mëssbrauch vu Muecht. Déi éischt zwee Kapitele kann een elo scho gratis am Internet liesen. No a no sollen ëmmer méi Partie vun der Geschicht publizéiert ginn. Bis den 10. Juli soll dann dat komplett Buch online sinn.

D'Schrëftstellerin huet sech bewosst dozou entscheet fir hiert neit Kannerbuch gratis zur Verfügung ze stellen. Et soll e klengen Trouscht si fir all déi Kanner, deenen den Ament duerch de Confinement eng ganz Rëtsch un anere Beschäftegunge feelt. "The Ickabog" sou heescht d'Kannerbuch, ass awer net ganz nei. D'J.K. Rowling huet d'Geschicht ronderëm den Ickabog scho virun 10 Joer geschriwwen. Deemools huet si et hiren eegene Kanner virum schlofe goe virgelies. D'Buch ass bis elo ni publizéiert ginn. Elo am Confinement wär si d'Geschicht, déi si deemools op Pabeier bruecht huet, nees op de Späicher siche gaangen.

Am November soll et dann och als Buch erauskommen. Fir d'Illustratiounen ass e Concours ausgeschriwwen. An zwar fir Kanner tëscht 7 an 12 Joer. Si oder besser gesot hir Eltere kënnen Zeechnungen eraschécken a mat bësse Chance ginn déi Biller dann och fir "The Ickabog" geholl. Bis elo dierfen awer just Kanner aus puer Länner deelhuelen, Lëtzebuerg ass net dobäi. Aner Länner sollen awer geschwënn och zougelooss ginn.

Bis elo ass d'Buch och souwisou just op Englesch ze liesen. Aner Sproochen an Iwwersetzunge sinn zwar geplangt, awer bis ewell gëtt et nach kee fixen Datum wann et esou wäit ass.

Den Erléis vum Buch, dat am Hierscht rauskënnt soll u Corona-Hëllefsprojete goen.