Wou ass déi beschte Plaz fir de Schreifdësch? Wou soll d'Bett higestallt ginn? Ass et eng gutt Iddi, e Spigel opzehänken? Beim Ariichte vun der Wunneng oder dem Büro orientéiere sech munch Leit un de Reegele vum Feng Shui. D'Iddi hannert dëser Philosophie aus dem ale China: De Mënsch a seng Ëmgéigend sollen en harmoneschen Accord bilden. Ginn et wëssenschaftlech Beweiser, dass dat funktionéiert? E Fall fir de Mister Science Joseph Rodesch!

30/09/2021 Mister Science

Wou ass déi beschte Plaz fir de Schreifdësch? Wou soll d'Bett higestallt ginn? Ass et eng gutt Iddi, e Spigel opzehänken? Beim Ariichte vun der Wunneng oder dem Büro orientéiere sech munch Leit un de Reegele vum Feng Shui. D'Iddi hannert dëser Philosophie aus dem ale China: De Mënsch a seng Ëmgéigend sollen en harmoneschen Accord bilden. Ginn et wëssenschaftlech Beweiser, dass dat funktionéiert?

Nee, déi ginn et net. Dat läit schonn eleng dorun, dass d'Basiskonzept vum Feng Shui net wierklech mat modernen naturwëssenschaftleche Methoden erfuerscht ka ginn, well et baséiert op enger geheimnisvoller Aart vun Energie oder Fluidum, dem sougenannte Qi oder Chi. No enger aler chineesescher Virstellung ass en iwwerall op der Welt ze fannen: a Bierger, Flëss, an der Loft, mä och a Miwwelen an dem mënschleche Kierper. Hei suergt en ënner anerem dofir, dass d'Organer hir Aufgaben erfëllen an d'Séil sech wuelfillt. Allerdéngs ass et der Fuerschung bis elo nach net gelong, d'Existenz vun esou engem Medium nozeweisen.

Engersäits huet dat, wat haut bei eis an Europa als Feng Shui ugebuede gëtt, just bedéngt eppes mat der ursprénglecher Theorie, déi Joerdausenden al ass, ze dinn. Et stécht eng komplex – an zum Deel vergiessen – Philosophie derhannert, déi Mënsch, Natur a Gebaier als ontrennbar Unitéit versteet. Mat hir verbonne war e Wëssen, dat aus vill verschiddenen Andréck an Erfarungen entstanen ass. Dat ass vill méi, ewéi just Miwwelen an Zëmmerplanzen op déi richteg Plaz ze stellen. Anerersäits kann eng Ariichtung, iwwer déi ee sech Gedanke gemaach huet, duerchaus e positiven Impakt op d'Wuelbefannen hunn, deen och wëssenschaftlech z'erklären ass.

Zum Beispill, wa Wäert drop geluecht gëtt, dass d'Wunneng propper an opgeraumt ass: Der Feng-Shui-Theorie no sollen d'Duerchgäng fräi si vun Dreck a sperrege Géigestänn, fir dass de Qi ouni Blocage duerch d'Raim stréime kann. Ecker a Kante kënnen heibäi och e Problem duerstellen an de Qi behënneren. Feng-Shui-Experten roden dowéinst ënner anerem, dass d'Zëmmeren opgeraumt sinn a kloer Linnen hunn. Och soll een d'Fënstere reegelméisseg botzen, well de Qi just esou eran- an erausfléisse kann. Mä ganz onofhängeg vun onerklärlechen Energiestréim hu Psychologe festgestallt: Eng uerdentlech a propper Ëmgéigend kann dozou bäidroen, Stress oder Ängschten ofzebauen. Gläichzäiteg fërdert si d'Kreativitéit a féiert zum Beispill am Büro zu besseren Aarbechtsresultater. Opzeraumen an ze botze kann u sech schonn hëllefen. E weideren Aspekt ass den Afloss vun de Faarwen – de richtege Choix spillt beim Feng Shui och eng Roll.

Fuerscher:innen hunn erausfonnt, dass d'Gehier Faarwen ënnerschiddlech deit. A si wëssen, dass Faarwe verschidde Wierkungen op de Mënsch hunn. Gréng zum Beispill berouegt, wärend Rout onroueg mécht. Giel verbessert net just d'Laun, mä léisst kleng Zëmmeren och méi grouss wierken. Blo ass eng gutt Faarf fir eng Schlofkummer, well et de Stress an och de Bluttdrock reduzéiere kann.

Da lount et sech also awer, déi eng oder aner Feng-Shui-Reegel zu behäerzegen. Allerdéngs brauch et dofir keng déifgrënneg Philosophie an och keng mysteriéis Energiestréim. Erkenntnisser vun der mënschlecher Psych ginn duer. Déi ass souwisou scho schwéier genuch ze verstoen – an d'Fuerschung wäert an dësem Beräich och nach esou munch Iwwerraschung bereethalen. Et bleift deemno spannend.

Auteur: scienceRELATIONS (Ralf Butscher)
Editor: Michèle Weber (FNR)
Iwwersetzerin: Danièle Di Cato (why vanilla?)