E Méindeg de Moie war den Dr. Pit Duschinger, designéierten neie President vun de Lëtzebuerger Gynekologen, eisen Invité vun der Redaktioun.

De Beruff vum Fraendokter gëtt ze deier a verléiert dowéinst un Attraktivitéit. Dat sot den Dr. Pit Duschinger am RTL-Interview.
Hien iwwerhëlt am Hierscht d'Presidence vun de Lëtzebuerger Gynekologen.

Ze deier, well déi obligatoresch Assurancë fir d'Fraendoktere vun ëmmer manner Assureuren iwwerholl ginn. An déi kënnen d'Präisser da praktesch sou gestalte wéi se wëllen, sou den Invité vun der Redaktioun.

Dat geet bis zu 25.000 Euro d'Joer.

E weidere finanzielle Problem ass déi obligatoresch Garde sur Place. Dës ass an de grousse Maternitéen um Kierchbierg an um Belair (CHL) mam neien Spidolsplang obligatoresch ginn. Se gëtt awer net bezuelt.

Den Dokter kann deemno net an der Praxis schaffen a muss och soss säi ganze Programm upassen. An dat bedeit Verloschter.

Den Dr. Pit Duschinger hofft elo op e Gespréich mam Gesondheetsminister deen, Zitat, "dat fault Ee" geierft hätt.

123 Fraendoktere ginn et den Ament am Land. "Mir kéinte sécher méi gebrauchen." De Manktem ass awer nach net esou akut datt et negativ Konsequenze fir d’Patienten hätt, sou nach den Dr. Duschinger.

AUDIO: Invité vun der Redaktioun: Dr. Pit Duschinger

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.