E Freideg de Moie war de President vun der Bréifdréieschgewerkschaft, de Raymond Juchem eisen Invité vun der Redaktioun.

Et feelt nach ëmmer u Bréifdréier. Dat bréngt natierlech Iwwerstonnen an duebel Tournéeë mat sech.

Vereenzelter géifen och nach ëmmer ausfalen. Sou de Raymond Juchem vun der Bréifdréieschgewerkschaft um Freideg de Mueren am RTL-Interview.

Den Ament gëtt vill agestallt, d'Situatioun géif sech verbesseren. Ma, de Beruff vum Bréifdréier misst awer och nees méi attraktiv ginn. Virop a Saache Loun.

D'Direktioun wier och prett, fir bei de Salairen nozebesseren.

De Sozialdialog bei der Post wier also korrekt, sou de Gewerkschaftler Juchem, deen och hofft, datt ee weider beim Ëmsetze vun der Post-Strategie 2018-2022 mat agebonne gëtt.

Well et däerf net nëmmen ëm de Profit goen.

Dat Wichtegst wier nämlech de Service fir d'Leit.

Ouni Post geet nämlech näischt, ënnersträicht de Raymond Juchem, deen als Beispill der Internet an d'Tëlee nennt.

Héich Investissementer wieren och wichteg. Zum Beispill a nei Logistik-Infrastrukturen. Speziell well ëmmer méi Päck verschéckt ginn, well d'Leit ëmmer méi iwwer Internet bestellen.

Zejoert wiere et 4 Millioune Päck gewiescht, déi duerch den Tri zu Beetebuerg gaange sinn.

D'Bréifdréieschgewerkschaft huet e Samschdeg de Mëtten hiren Nationalkongress.

AUDIO: Invité vun der Redaktioun: Raymond Juchem

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.