E Dënschdeg de Moie war de Generalsekretär vun der Horesca, de François Koepp, eisen Invité vun der Redaktioun.

D’Horesca - den Daachverband vun den Hotelieren, Restaurateuren a Cafetieren - hat e Méindeg den Owend Generalversammlung. Eng 2.900 Betriber, wou iwwer 18.000 Leit schaffen, gëtt et hei am Land an deem Secteur. Wou de Schong dréckt a wéi et sech awer och gutt Sue verdénge léisst, hu mer de Generalsekretär vun der Horesca gefrot.

De François Koepp war den Invité vun der RTL-Redaktioun den Dënschdeg de Moie géint 10 op 8. De Mindestloun, deen an d'Luucht geet an déi zwee nei fräi Deeg belaaschten den Horesca-Secteur. Am ganzen dierften déi zwou Saachen d'Betriber 10 Milliounen Euro kaschten. 5 Millioune fir d'Hausse vum Mindestloun a 5 Milliounen Euro fir déi zwee nei fräi Deeg. An do géifen d'Betriber kucken, déi zousätzlech Käschten zum Deel op d'Margen ze verrechnen, also aus der eegener Täsch ze bezuelen an awer och d'Präisser ze héijen, fir esou d'Käschten zum Deel op de Client ofzewälzen. Dat sot den Dënschdeg de Moien den Generalsekretär vun der Horesca, de François Koepp.

Op d'Evolutioun vum Horesca-Secteur ugeschwat, sot de François Koepp, datt klassesch Bistroe sech net méi droe kéinten, wa se net een neit Konzept ausgeschafft hunn an eng nei Clientèle ugezunn hunn. D'Hoteller, d'Restauranten an d'Caféë misste mat der Zäit goen a sech dem Client upassen. Ëmmer méi dacks géif een och gesinn, datt grouss Chaînen op den Terrain kommen, oder Restaurante sech zum Beispill zesummendinn, fir kënnen z'iwwerliewen.

Wat Airbnb ugeet, sot de François Koepp, datt een net géint déi Plattform wier. Ma wann hei Abuse bedriwwe géifen, wier dat eng ganz aner Fro. Et géife Beispiller ginn, wou an der Stad an engem Haus eng 20 Appartementer verlount ginn. Oplage missten déi keng erfëllen wéi d'Hotelieren, dat wär e grousse Problem, wou d'Politik misst reagéieren.

AUDIO: Invité vun der Redaktioun (26. Mäerz) - François Koepp

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.