Eis Invitée vun der Redaktioun e Mëttwoch de Moie war d'Direktesch vun der Nationalbibliothéik.

„Ech freeë mech, dass mer endlech alles beieneen hunn“. Dat sot d’Monique Kieffer e Mëttwoch de Moien als eis Invitée vun der Redaktioun.

AUDIO: Résumé Invité Monique Kieffer - Reportage Pit Everling

D'Nationalbibliothéik plënnert jo an en neit, grousst Gebai op de Kierchbierg, den 1. Abrëll ass et lass gaangen. Am August sollen déi lescht Bicher geplënnert sinn an Enn September geet déi nei Nationalbibliothéik dann um Kierchbierg an der Avenue Kennedy op.

D’Directrice vun der Nationalbibliothéik sot, datt déi ganz Plënneraktioun bis ewell gutt géif lafen. 5 Plënnerfirmen sinn am gaangen déi iwwer 1,8 Milliounen Dokumenter, respektiv 40 Kilometer Bicher, Dokumenter, Zäitschrëften, Plakater, Grafiken, oder Manuskripter op de Kierchbierg ze bréngen.

Wärend deem ganze Geplënners bleift déi aktuell Nationalbibliothéik op, wann och deels ageschränkt. Dat ass och villäicht eng Geleeënheet, fir vun der Offer vun elektronesche Bicher ze profitéieren. Op ebooks.lu fënnt een där 620'000, och trivial oder praktesch Saache wéi Reesguiden oder Kachbicher. Déi kann ee da gratis léinen an op sengem Tablet oder Handy liesen.

AUDIO: Invité vun der Redaktioun: Monique Kieffer

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.