Eis Invitée vun der Redaktioun en Donneschdeg de Moie war d'Presidentin vun der Douanesgewerkschaft.

AUDIO: Resumé Invité Lynn Luciani / Reportage Nico Graf

„D’Situatioun ass inakzeptabel, a mir hätte gär Kloerheet, an zwar sou séier wéi méiglech...“

Dat sot d’Lynn Luciani um Donneschdeg de Moien als eis Invitée vun der Redaktioun.

D’Presidentin vun der Douanesgewerkschaft stéiert sech, genee wéi et och bei der Police de Fall ass, um neie Gesetz iwwert d’Aarbechtszäitreegelung, mat den Zäitspuerkonten.

Do steet nämlech dran, datt een net méi iwwer 10 Stonnen den Dag eraus (8+2 Stonnen) däerf schaffen. D'Douaniere schaffen awer dacks iwwert déi Zäit eraus, deels bis zu 24 Stonnen, si sinn da quasi an der Illegalitéit an deen Ament net méi ofgeséchert, kritiséiert d'Douanesgewerkschaft.

De Beruff vum Douanier huet sech zanter 1995 mam Schengen-Raum an dem Ewechfale vun de Grenze komplett verännert, vill Tâche si bäikomm, mä d'Douaniere krute villes ewech geholl, beklot sech d'Gewerkschaft. Si wëllen och, datt hir Carrière opgewäert gëtt.

Et sicht een dowéinst d'Gespréich mat der Direktioun. Den zoustännege Minister ass de Finanzminister Pierre Gramegna.

AUDIO: Invité vun der Redaktioun: Lynn Luciani

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.