Eisen Invité vun der Redaktioun en Donneschdeg de Moien war de Jim Goerres vu MemoShoah Lëtzebuerg.

Fir dass d’Geschicht sech net widderhëlt, dofir steet d’MemoShoah, déi et elo zanter ronn 4,5 Joer hei am Land gëtt.

De Jim Goerres vu MemoShoao war en Donneschdeg de Moien eisen Invité vun der Redaktioun an huet do den Appell gemaach, dass mer hei am Land en onofhängegen Observatoire bréichten, deen antisemitesch Virfäll géif dokumentéieren a festhalen. Bis ewell géif et just eng privat Initiativ an deem Sënn ginn, mä keng staatlech. D’Politik hätt an deem Sënn geschlof, sou de Jim Goerres. Et bréicht een eng neutral Plaz, wou d’Informatioune kéinten zesummegedroe ginn.

Am Verglach mam Ausland wier een hei zu Lëtzebuerg bis ewell nach gutt ewechkomm, wat antisemitesch Tëschefäll ugeet. 2017 goufe beispillsweis 13 Akte vun Antisemitismus registréiert.

Dacks géifen hautdesdaags jo d’Judden nach ëmmer responsabel gemaach ginn, fir Saachen, déi op politeschem oder soziale Plang schif lafen. Deem kéint ee just entgéintwierken, andeems een opkläert, an d‘Leit zum Denken beweegt , sot de Jim Goerres. Fake-News entgéintwierken wier an eiser haiteger Spaassgesellschaft net einfach, mä et misst een hannerfroen an net blannemännches gleewen, wat verbreet gëtt.

AUDIO: Invité vun der Redaktioun: Jim Goerres

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.