En Dënschdeg de Moie war de President vun der Chambre de Commerce eisen Invité vun der Redaktioun.

“Grad meng Liewenserfarung als Politiker an als Affekot, hëllefe mer bei menger Aufgab als neie President vun der chambre de Commerce, mä ech garantéieren, dass d’Handelskammer weiderhi politesch neutral bleift.“

Dat sot de Luc Frieden en Dënschdeg de Moien als eisen Invité vun der Redaktioun.

Hie géif béid Säiten kennen, a wéisst wéi eng Kompromëssbereetschaft een heiansdo misst hunn.

Zu den 3 Haaptaufgaben a sengem neie Rôle, a generell der Chambre de commerce fir d’Zukunft, huet hien d’Digitalisatioun bezeechent, grad wéi d’Formatioun, an de fräien Handel am europäesche Bannemaart ze assuréieren.

Dëse leschte Punkt wier kruzial fir Lëtzebuerg, well ganz vill Gidder an de Grand-Duché importéiert, respektiv exportéiert ginn.

De Luc Frieden ass och de President vum Verwaltungsrot vun der BIL, wou e chinesesche Partner jo zanter Kuerzem mat u Bord ass.

Trotzdeem wier d’BIL weider eng lëtzebuergesch Bank, a géif dat och bleiwen.

Déi chinesesch Holding wier net bestëmmend, mä hiren Engagement  wier eng Win-Win-Situatioun fir béid Partner, sou de Luc Frieden.

AUDIO: Invité vun der Redaktioun: Luc Frieden

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.