En Donneschdeg de Moie war de Marc-André Bechet vun der Associatioun vun der Fongenindustrie, der ALFI onsen Invité vun der Redaktioun.

D’Fongen-Industrie zu Lëtzebuerg geréiert den Ament iwwer 4.000 Milliarden €.

Mat méi wéi 15.000 Aarbechtsplaze stellt dee Secteur ronn een Drëttel vun allen Aarbechtsplazen op der nationaler Finanzplaz.

Iwwer Steiere wéi d’Taxe d’abonnement bezilt d’Fongenindustrie ëmmerhin 10% vun de Recetten am Staatsbudget.

Dës Zuelen huet de Marc-André Bechet um Donneschdeg de Moien als eisen Invité vun der Redaktioun genannt.

Senger Meenung no hätt de Staat eng virbildlech Haltung ageholl, fir déi néideg gesetzlech Kaderen ze schafen, fir dass de Secteur sech gutt konnt entwéckelen.

Eng Entwécklung déi ëmmer méi an d’Richtung vun gréngen a nohaltege Fonge geet.

„Et géif drëms goen, fir d’Welt besser ze maachen“, sot et de Marc-André Bechet.

Senger Meenung no wier et iwwerdeems net esou, dass Lëtzebuerg am Kontext vun de Steiergesetzer géif fuddelen oder tricksen. Dat wier vläicht nach esou an de Käpp vun de Leit, mä d’Realitéit wier just de Contraire.

Nämlech, dass sämtlech europäesch Direktiven an europäescht Recht ëmgesat goufen.

AUDIO: Invité vun der Redaktioun: Marc-André Bechet

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.