E Freideg de Moie war de Roger Infalt vun der Lëtzebuerger Associatioun vun de professionelle Journalisten onsen Invité vun der Redaktioun.

Um 3. Mee ass den internationalen Dag vun der Pressefräiheet.

Déi systematesch Hetzjuegd géint Journalisten a ville Länner op der Welt géif derzou féieren, dass d’Presse an engem Klima misst schaffen, dat ëmmer méi vun Angscht dominéiert ass, heescht et vu Reporter Ouni Grenzen.

Zu de Regiounen wou sech d’Situatioun fir Journalisten am leschte Joer am meeschte verschlechtert hätt, géif och Europa zielen, heescht et an engem Rapport, dee Mëtt Abrëll vun der ONG publizéiert gouf.

Ëmmer méi populistesch Regierungen géifen d’Press ëffentlech diffaméieren.

Am Ranking vun de Länner wou d’Pressefräiheet am beschten ass, fënnt een op den éischten 3 Plazen weiderhin déi skandinavesch Natiounen Norwegen, Finnland a Schweden.

Lëtzebuerg läit op der 17. Plaz vun 180 Länner, hannert der Belsch, Portugal an Däitschland...

Domadder kéint ee sech net zefridde ginn, sot um Freideg de Moien de Roger Infalt vum Lëtzebuerer Presserot als eisen Invité vun der Redaktioun.

Et hätt een duerchaus gemierkt, dass déi national Press ëmmer méi ënner Drock gesat gëtt, op eng perfid Aart-a-Weis.

Dofir misst een ëmmer nees kloer maachen, dass Pressefräiheet näischt ass, wat ee kafe kann.

Wichteg wier et och, dass d’Journaliste vun hire Verlagshaiser, hiren Direktiounen an hire Chefredaktiounen de Réck fir hir Aarbecht gestäipt kréien.

De Roger Infalt fënnt, dass et hei am Land duerchaus esou wär, dass d’Press ze brav agéiert. Dat wier e bekannte Problem, well mer sou e klengt Land sinn, a jidderee jidderee kennt. Derbäi kéim den Zäitdrock an deem haut misst geschafft ginn, deen eng detailléiert Recherche dacks net méi géif erméiglechen.

Sief nach drun erënnert, datt d'ALJP an de Presserot nächste Méindeg um 19 Auer op eng Konferenz zum Thema „Pressefräiheet ënner Drock“ invitéieren,  dat an de Rotonden.

AUDIO: Invité vun der Redaktioun: Roger Infalt

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.