Um Méindeg de Moie war den Aarbechtsminister Dan Kersch den Invité vun der Redaktioun.

Den Europadag, den 9. Mee als Feierdag, soll ee politescht Zeeche sinn. D'Kritik, datt dorënner d'Produktivitéit vum Land leit, géif hien zur Kenntnis huelen, esou den Aarbechtsminister Dan Kersch. Hie war um Méindeg de Moien eisen Invité vun der Redaktioun.

Mat deem zousätzleche Feierdag, géif d'Regierung awer hir politesch Verantwortung huelen. Et hätt een net direkt mat de Patronen iwwert déi nei fräi Deeg geschwat, mä mam Vollek bei de Walen. Och d'Politik hätt eppes ze soen, net nëmmen d'Patronen, esou den Dan Kersch.

Am Verglach mat den aneren EU an OECD Länner wier Lëtzebuerg eent vun de Länner, wou am meeschte geschafft gëtt, dofir misst een de Leit eppes zeréck ginn. Et wier och net esou, wéi wann d'Patronen näischt bäikritt hätten. Et ass awer fir den LSAP-Aarbechtsminister en NO-GO, datt verschidde Betriber gäre wéineg Stéiere bezuelen, Avantage wëllen hunn, mä de Salarié vun der gudder wirtschaftlecher Situatioun näischt sollt ze spiere kréien.

Op d'Europawalen ugeschwat, déi an 20 Deeg sinn, hofft den Dan Kersch, datt eng Ëmverdeelung geschitt. D'Leit solle méi vun Europa profitéieren. 2014 krut d'LSAP just 12% an ee Sëtz am Europaparlament... de Minister gesäit dee Sëtz net wackelen, éischter nach en zweeten zu Gonschte vun der LSAP.

Wat d'Representativitéit vun der ALEBA am Bankesecteur ugeet, sou géif déi fir de Moment weider bestoe bleiwen, sot um Méindeg de Moien nach den Dan Kersch. Trotz den 49,22%. 50% am Secteur missten et sinn, fir weider eleng e Kollektivvertrag kënnen z'ënnerschreiwen. Mä bis ewell hätt ee keng Demande erakritt vun enger anerer Gewerkschaft, déi dës Representativitéit ufechte géif.

AUDIO: Invité vun der Redaktioun: Dan Kersch

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.