De Professer Claude Braun war e Méindeg de Moien eisen Invité vun der Redaktioun.

Niere-Krankheete si ganz dacks deier Affären, déi de Gesondheetssystem all Joer bis zu 80- bis 90.000€ pro Patient kënne kaschten.

Dat sot de Professer Claude Braun um Méindeg de Moien als eisen Invité vun der Redaktioun.

Et geet een dervun aus, dass ronn 10% vun der Populatioun un enger chronescher Nierekrankheet leiden. Déi grouss Majoritéit dovunner wéisst et awer selwer mol net, seet de Nierespezialist a medezineschen Direkter vun den Hôpitaux Robert Schuman.

Zanter 8 Méint gëtt et elo déi sougenannte "clinique du rein" an der Zithaklinik an am Kierchbierger Spidol. Ënnert anerem gëtt do mat sougenannten Partnerpatiente geschafft. Dat si Leit, déi selwer betraff si vun Niereproblemer, an och schonn Traitementer matgemeet hunn, an hir Erfarungen esou neie Patienten kënne vermëttelen.

Präventiv virbeugen kann een Nieren-Dysfonctionnementer iwwregens, andeems een all Dag genuch drénkt. 1,5 bis 2 Liter den Dag géifen duer goen.

Patiente mat chronesche Nierekrankheeten hunn och e méi héije Risk fir en Häerzinfarkt oder e Schlag ze maachen.

AUDIO: Invité vun der Redaktioun: Professer Claude Braun

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.