Den Energieminister war e Mëttwoch de Moien eisen Invité vun der Redaktioun.

D’Hausse vun den Accisen op Bensin an Diesel ass ee Schratt, fir de Widdersproch op ze léisen, tëscht Tanktourismus an eiser nationaler Klimapolitik. Dat sot den Energieminister Claude Turmes um Mëttwoch de Moien als eisen Invité vun der Redaktioun.

Lëtzebuerg hätt an de leschte Joren en enormen Effort an der Klimapolitik gemaach, mä den Tanktourismus géif eis Klimabilanz futti maachen.

Dofir wéilt ee sozial gerecht géigesteieren an Alternative schafen.

De Claude Turmes huet a Punkto Accisen vun engem "reegelméissegen Effort geschwat, wat deemno kéint drop hindeiten, dass d’Accisen an den nächste Jore weider eropgesat kéinte ginn". Et géife Gespréicher tëscht him, der Ëmweltministesch an dem Finanzminister lafen.

Wichteg wier et dem Claude Turmes no, Suen an de Klimafong eran ze kréien, mat deene gréng a klimafrëndlech Initiative finanzéiert kéinte ginn, vun deenen och d’Leit beispillsweis via Subsiden kéinte profitéieren.

AUDIO: Invité vun der Redaktioun: Claude Turmes

An der Mëttegstonn hutt Dir dann d’Wuert a kënnt Är Meenung soen zur Klima- an Energiepolitik. Setzt d’Regierung déi richteg Akzenter? Musse mer vum Tanktourismus fort? Wéi spuere mer CO2-Emissiounen? Ass d’Elektromobilitéit d’Léisung?

Dir kënnt eis elo schonn uruffen um Repondeur 13 33, iwwert RTL.lu oder Facebook matdiskutéieren. Oder en Mëttwoch de Mëtteg tëscht 12 an 1 live uruffen.

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.