De President vun der Proffegewerkschaft Féduse war e Freideg de Moien eisen Invité vun der Redaktioun.

“Et ass wéi sou dacks, et gi gemëschte Gefiller »

Esou huet de President vun der Féduse, de Raoul Scholtes, um Freideg de Moien als eisen Invité vun der Redaktioun, op d’Reform vum Secondaire reagéiert, déi den Ament um Instanzewee ass.

D’Proffegewerkschaft bedauert et generell, dass een am Laf vun de leschte 6 Joer, net genuch an d’Gespréicher vum Ausschaffe vun der Reform mat abezunn gi wär.

De Raoul Scholtes huet an deem Sënn vun enger relativ gudder Relatioun mam Ministère geschwat, awer enger méi schwiereger mat deem, dee schlussendlech d’Decisiounen hëlt, also dem Minister Claude Meisch.

Soll d’Gesetz nach virum 1. September gestëmmt ginn, da géif d’Reform fir d’Rentrée dëst Joer a Kraaft trieden.

Bei der Féduse hofft een, dass bis dohinner nach an de Projet de loi ageschriwwe gëtt, dass nom Stage, dee jo just nach 2 Joer laang dauert, en Examen an den zwee ordre d’enseignement sollt gemaach ginn, also am Classique an am Général, an dass een dofir och zwee verschidden Tuteure sollt hunn.

De Raoul Scholtes kéint sech och gutt virstellen, dass de Ministère mol eng Zorte Campagne sollt starten, fir der Penurie u Proffen entgéint ze wierken. Am Ausland wier dat scho gemeet ginn. Duerchaus virstellbar wier esou eng Campagne schonn an de Lycéeën. Et wéilt een als Proff net méi de Stoussnéckel vun der Natioun sinn, wat hautdesdaags awer dacks esou d’Perceptioun vun de Leit wier.

AUDIO: Invité vun der Redaktioun: Raoul Scholtes

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.