De Robert Mannes vum Institut Viti-Vinicole war en Dënschdeg de Moien eisen Invité vun der Redaktioun.

"Et ass eng Fatalitéit, do kanns de näischt maachen…"

Dat sot de Robert Mannes vum Institut viti-vinicole um Dënschdeg de Moien als eisen Invité vun der Redaktioun, zum immense Schued an de Wéngerten, deen et den Ament op der Musel gëtt.

Schold war carrément just eng eenzeg Nuecht, an zwar déi vum 4. op de 5. Mee, wéi et nuets Minusgraden gouf, kombinéiert mat enger héijeer Fiichtegkeet.

Dat hätt derzou gefouert dass d’Riewen erfruer sinn.

Et géif Lage ginn, do sinn 100% erfruer. Iwwert d’ganz Musel gesinn, misst ee mat engem Ausfall vu 40 bis 50% rechnen.

Wéngerte goufen äiskal erwëscht
Eng kal a fiicht Nuecht ass duergaangen, fir dass op der Musel eng ganz Recolte a Fro gestallt ass.

Dem Robert Mannes no géif et Wënzer ginn, déi dëst Joer guer net bréichten an d’Lies ze goen. Zum Gléck wiere vill Parzellen awer deels verséchert. 65% vun der Versécherungsprime bezilt jo och de Staat, an et kéint een nach weider Hëllef ufroen.

Sech op sou e Wieder-Szenario preparéieren, dat wier iwwregens nëmme ganz schwiireg bis guer net méiglech, well d’Begebenheeten vun de Wéngerten dat net zouloossen. Et kéint een net e ganzen Hang zoudecken, an och oppent Feier, wéi dat a Frankräich gemeet gëtt, wier op der Musel net machbar, sou nach de Robert Mannes.

Op d’Qualitéit vum Wäin hätt dat Ganzt iwwerdeems keen Afloss.

AUDIO: Invité vun der Redaktioun: Robert Mannes

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.