De Paschtouer an Oktavpriedeger 2019 war um Mëttwoch Invité vun der Redaktioun.

"D'Kierch ass keng Vollekskierch méi, mä eng Kierch am Vollek. Mä mir huelen déi Leit, déi do sinn, seriö." Den Oktavpriedeger, de Paschtouer Guy Diederich, war de Mëttwoch de Moien eisen Invité vun der Redaktioun. De Public an de Kierchen ass am Laf vun de Jore vill méi kleng ginn, d'Pore méi grouss, mä d'Aarbecht als Paschtouer wier am Kär déi selwecht bliwwen.

All Dag – wärend der Oktav – hält de Guy Diederich mëttes an der Andacht um 16 Auer seng Oktavpriedegt. 14 Stéck sinn am Ganzen. Hien huet déi all selwer geschriwwen, 106 Säiten op der Hand, wéi hie sot.

Fir d'Themen ze definéieren, huet hien d'Leit gefrot, wat si wéilten héieren...sou kënnt a senge Priedegten och zum Beispill de Klimaschutz ze Wuert oder de Mëttwoch de Mëtteg d'Sexualitéit an och de Mëssbrauch an der Kathoulescher Kierch.

D’Oktav bedeit wahrscheinlech fir jidder eenzelen eppes anescht. Fir d’Kierch wier et eng staark Zäit, wou de Glawe vu ville verdéift gëtt, sot de Mëttwoch de Moien de Guy Diederich. Et komme manner Leit, dofir kéint een iwwer Ännerungen nodenken. 1921 ass aus der enger Woch zwou Woche ginn. Moies gëtt gepilgert. Do kéint ee villäicht op d'Gewunnechte vun de Leit reagéieren, mengt den Oktavpriedeger. Miersch zum Beispill pilgert elo mëttes. Am Nomëtteg oder am fréien Owend hätten haut d'Leit besser Zäit.

Et ass och schonn driwwer nogeduecht ginn, fir d'Oktav méi laang ze zéien a just op Weekender ze maachen. Mä dat gëtt dann awer schwiereg mam Mäertchen, sot de Guy Diederich. An de Mäertchen géif awer zur Oktav gehéieren.

AUDIO: Invité vun der Redaktioun: Guy Diederich

Duerch technesch Problemer ass de Video vun der Emissioun net komplett opgeholl ginn. Entschëllegt w.e.g. d'Ëmstänn.

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.