De President vun der AMMD, der Associatioun vun den Dokteren an Zänndokteren, war en Donneschdeg eisen Invité vun der Redaktioun.

De Lëtzebuerger Gesondheetssystem ass krank, soen d'Dokteren. Si si mat villem onzefridden... 
E Mëttwoch huet een dat och op der Quadripartite däitlech gemierkt an et ass nozeliesen an engem Pabeier, dee si – op Wonsch – fir de Minister vun der Sécurité Sociale Romain Schneider ausgeschafft hunn.

De President vun der AMMD, der Associatioun vun den Dokteren an Zänndokteren, den Dr. Alain Schmit war en Donneschdeg de Moien eisen Invité vun der Redaktioun. D'Leeschtunge fir de Patient (am Lëtzebuerger Gesondheetssystem) wieren net gutt genuch, dem Fortschrëtt net ugepasst. Et feelen och Dokteren an de System misst och fir d'Dokteren attraktiv ginn, soss fanne mer keng méi an d'Leit kënnen net behandelt ginn, sot den AMMD-President de Moien. Den Dr. Alain Schmit fuerdert besonnesch en Ëmdenken an de Spidolstrukturen. Déi wieren ëmmer méi grouss, schwéierfälleg a bürokratesch.

An Zukunft sollen d'Dokteren, d'Spezialiste méi dezentral, a méi klenge Strukturen, d'Patiente kënnen ambulant behandelen, sou wéi den Zänndokter dat haut scho mécht.

Wat de Sträit ëm d’Nomenclatures-Kommissioun ugeet, wou iwwer d'Leeschtunge fir de Patient decidéiert gëtt a wou d’AMMD net méi higeet, wier d’Grond-Viraussetzung fir zeréck ze kommen déi, datt en neutrale President misst agesat ginn. Dee misst dann tëscht der CNS, der Gesondheetskees, an den Doktere vermëttelen.

De Ball géif elo beim Minister Romain Schneider leien.

AUDIO: Invité vun der Redaktioun: Dr. Alain Schmit

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.