D'Aktivistin Michelle Barthel war e Freideg de Moien eis Invitée vun der Redaktioun.

"Mer mussen de Wirtschaftsmodell änneren, no deem senge Reegele mer haut liewen". Dat sot d’Michelle Barthel um Freideg de Moien eis als Invitée vun der Redaktioun.

Déi jonk Aktivistin ass eng vun den Initiatricë vum sougenannten „zivillen Ongehorsam“, dee fir e Freideg de Mëtteg geplangt ass.

Mat der éischter Klima-Demo vun de Schüler virun e puer Wochen hätt een et scho fäerdeg bruecht, dass net just d’Politik, mä och den normale Bierger matkritt hätt, dass e Problem do ass. Et gëtt den Ament jo ganz vill iwwert Klimaproblemer geschwat, mä et hätt een den Androck, dass probéiert gëtt op Zäit ze spillen. Sämtlech politesch Mesurë vun deene geschwat géif ginn, ginn net duer, sou d’Michelle Barthel. Se wieren all ze wäit an d’Zukunft fixéiert oder net radikal genuch.

Occupy for Climate…, ënnert deem Slogan steet déi weider Klima-Demo um Freideg an der Stad.

Um 15 Auer wëll ee sech op der Europa-Plaz um Kierchbierg treffen, a gemeinsam d’Rout Bréck besetzen. Eiser Invitée vun der Redaktioun no, gi sech op d’mannst 1000 Manifestanten erwaart.

Zwee Deeg virun den Europawale misst een drop opmierksam maachen, dass et e Sonndeg net just drëms geet en neit EU-Parlament personell ze bestëmmen, mä et wier och eng Klima-Wal, heescht et vun den Initiateuren.

Déi soen awer och, dass et net géif drëms goen, fir e grousse Stau ze provozéieren, mä et wéilt een d’Message kloer un de Mann bréngen.

D’Initiateuren ënnersträichen och, dass een näischt wéilt mat Gewalt ze dinn hunn. D’Demo soll friddlech oflafen, an dofir huet een op de sozialen Netzwierker och rout Linne publizéiert, wéi d’Manifestanten sech solle verhalen.

AUDIO: Invité vun der Redaktioun: Michelle Barthel

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.