D'Cheffin vun der permanenter Vertriedung vun der EU-Kommissioun hei zu Lëtzebuerg war en Dënschdeg de Moien eis Invitée vun der Redaktioun.

Europa ass kee Selbstleefer, ma wann een d'Participatioun un den Europawalen an d'Mobilisatioun vun de Bierger kuckt, da géif ee gesinn, datt ee Resultat do ass, esou d'Yuriko Backes, Chef vun der permanenter Vertriedung vun der EU-Kommissioun hei zu Lëtzebuerg. Si war eis Invitée vun der Redaktioun.

Wat elo d'Euroskeptiker, an do d'Victoire a Frankräich oder Italien ugeet, sot d'Yuriko Backes sech net ze vill Gedanken do ze maachen, ëmmerhin wiere ronn 500 Sëtz vun den 751 am Europaparlament, déi an den Hänn vu pro-europäesche Parteien wieren. Déi misste sech elo méi breet opstellen. Si géif och net dovunner ausgoen, datt ënnert esou Konditiounen, europafeindlech Parteien de Projet Europa kéinte stoppen.

Wat elo d'Top-Plazen an den europäeschen Institutiounen ugeet, do virop den Job vum EU-Kommissiounspresident, gëtt d'Yuriko Backes ze bedenken, datt dat Decisioune sinn, déi d'Bierger manner interesséieren. Vill méi géifen déi kucken, wat an der EU geschafft a geleescht gëtt.

Wien da Successeur vum EU-Kommissiounspresident Jean-Claude Juncker gëtt, mat där Fro beschäftege sech en Dënschdeg den Owend zu Bréissel op engem Spezial Sommet, d'Staats- a Regierungscheffen op Invitatioun vum EU-Rotspresident Donald Tusk. D'Konzept vum Spëtzekandidat vun de Parteie gëtt jo vu Verschiddenen a Fro gestallt, do zum Beispill dem franséische President Emmanuel Macron. 2014 konnt d'EVP mat de Sozialdemokraten eng Majoritéit am EU-Parlament forméieren, an hat dunn de Jean-Claude Juncker proposéiert. Elo bei dëse Wale kommen d'EVP an d'Sozialdemokraten awer net op eng absolut Majoritéit.  Et ass awer net nëmmen dee Posten ze besetzen, mä och dee vun der europäescher Zentralbank, dem europäesche Conseil an dem Europaparlament. Donieft soll awer och iwwert d'Resultat vun den Europawalen am allgemengen debattéiert ginn. Fir Lëtzebuerg ass de Premier Xavier Bettel an der belscher Haaptstad.

AUDIO: Invité vun der Redaktioun: Yuriko Backes

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.