De fréiere Minister an Europadeputéierte war e Mëttwoch de Moien eisen Invité vun der Redaktioun.

Den EVP-Politiker Manfred Weber ass net de Favorit vun der grousser Majoritéit, wann et ëm de Poste vum EU-Kommissiounspresident geet. Där Meenung war de laangjäregen LSAP-Politiker Robert Goebbels um Mëttwoch de Moien hei op RTL.

Dem  fréiere Minister an Europadeputéierten no, wieren déi éischt, déi an esou Situatioune genannt ginn och déi éischt déi un der Front stierwen. Duerno kéim da sécherlech ee Kompromësskandidat an d'Spill. An nach wier net alles kloer. Souwisou: et géinge méi wichteg Posten an der EU ginn, sou de Robert Goebbels. Do virop dee vun der europäescher Zentralbank. Och dee Poste muss jo nei besat ginn.

De Robert Goebbels huet um Mëttwoch de Moien och déi Gréng hei zu Lëtzebuerg kritiséiert a besonnesch d’Propos vum Carole Dieschbourg, fir kleng Gäert ze bestellen oder déi vum Claude Turmes, fir kee Fleesch méi z’iessen. Hie géing d’Klimakris net a Fro stellen, mä déi Gréng géingen „iwwerdreiwen“ a mat Visioune kommen „déi näischt bréngen“.

Zur Krise vun de Sozialdemokraten a vun de Chrëschtdemokraten sot de fréieren LSAP-Politiker, et wier haut ganz schwiereg eng solidaresch Politik ze prekoniséieren, déi all Gesellschaftsschichten sollen deelen. Dowéinst kéimen elo „Ee-Punkt Parteien“ wéi d’Piraten an d’Spill.

Op d’Fro ob d’CSV an d’LSAP sech missten zesummendinn huet de Robert Goebbels geäntwert: „Ech hat viru 15 Joer en Artikel am Télécran geschriwwen, wou ech virausgesot hunn, datt et eng Kéier zu enger Fusioun vun CSV an LSAP géing kommen“. Dat wier awer natierlech méi Ironie gewiescht.

AUDIO: Invité vun der Redaktioun: Robert Goebbels

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.