De President vum Lampertsbierger Syndikat war e Freideg de Moien eisen Invité vun der Redaktioun.

Et ass net onbedéngt un der Gemeng eenzel Haiser ze schützen, mä um Kulturministère, ma op Gemengesäit hätt ee sech méi kéinten asetzen. Dat sot um Freideg de Moien de President vum Lampertsbierger Syndikat de Romain Diederich. Hie war eisen Invité vun der Redaktioun an ass do ënnert anerem op d'Ofrappe vun alen Haiser um Lampertsbierg agaangen. Wat d'Densitéit am Stater Quartier ugeet, hätt een an der Vergaangenheet Feeler gemaach, esou diicht wëllen ze bauen. Elo hätt een de Problem vum Verkéier. Och am Norde vum Lampertsbierg wiere Residencen am gaange gebaut ze ginn, an och do géif dann d'Densitéit an d'Luucht goen. Zwou Schoule sollen jo am ieweschten Deel verschwannen, an duerch Wunnunitéiten ersat ginn. Dobäi dierft een d'Gréngflächen net aus den Ae verléieren.

Wat d'Entlaaschtung um Verkéiersniveau ugeet, huet de Lampertsbierger Syndikat jo eng Vëlospasserelle proposéiert, fir den Norde mam Bambësch ze verbannen. Et misst een nämlech aner Mobilitéitsmoyene favoriséieren am Plaz vum Auto. Esou eng Passerelle kéim och der Millebaach ze gutt, esou de Romain Diederich.

"Landesplanung ass méiglech. Et feelt net u Konzepter, mee de Problem ass d’Ëmsetzung dovunner.", esou de fréiere Chef vun der Landesplanung an aktuelle President vum Lampertsbierger Syndikat. Dem Romain Diederich no bräicht een zwou Saachen: éischtens politesche Courage, well et wieren net d’Spezialisten, déi d'Decisiounen treffen. Zweetens wier et d’Rechtsécherheet. Zu Lëtzebuerg hätt een hei de Problem vun der "ganz héijer Astufung vum private Eegentum" an dorënner géing den Intérêt général leiden.

AUDIO: Invité vun der Redaktioun: Romain Diederich

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.