Den Direkter vum Cluster fir Logistik, Malik Zeniti war um Méindeg de Moien eisen Invité vun der Redaktioun.

"Et ass eng Success-Story – de Secteur huet sech wierklech immens gutt entwéckelt."

Dat sot den Direkter vum Cluster for Logistics um Méindeg de Moien als eisen Invité vun der Redaktioun.

De Malik Zeniti huet op 10 erfollegräich Joren zeréck gekuckt, déi et de Cluster elo schonns gëtt.

Wärend där Zäit wier et ënnert anerem gelongen, d’Logistik als Fach am Secondaire technique anzeféieren. Déi éischt Jonk déi eng Léier dodran gemaach hunn, ginn dëse Summer fäerdeg.

Et wier kloer, dass de Secteur ëmmer méi mat der Zäit geet an esou d’Digitalisatioun eng grouss Roll spillt. Ebe genee dofir hätt de Secteur och nach e grousst Potential, well ëmmer besser-forméiert Leit gebraucht géife ginn, sou de Malik Zeniti.

Net immens frou ass ee beim Cluster natierlech iwwert d’Hausse vun den Accisen um Bensin an um Diesel, wéi och iwwert d’Diskussiounen vun enger méiglecher Kerosin-Steier. Elo wou et de Betriber nach gutt géif goen, kéint een déi Méikäschten nach ausgläichen. Eis Nopeschlänner, wéi zum Beispill d’Belsch wieren do awer aner fiskal Weeër gaangen, déi am Endeffekt och de Secteur nees ënnerstëtzen, wat méi Sënn géif maachen, sou den Direkter vum Cluster for Logistics.

AUDIO: Invité vun der Redaktioun: Malik Zeniti