D'Presidentin vun der grénger Fraktioun war e Mëttwoch de Moien eis Invitée vun der Redaktioun.

"Mer sinn als Gréng scho laang eng Vollekspartei, déi hir Responsabilitéit iwwerholl huet, an ech denken net, dass mer eis Grondprinzipien hu missten iwwer Bord werfen". Dat sot d'Josée Lorsché um Mëttwoch de Moien als eis Invitée vun der Redaktioun.

Déi gréng Fraktiounscheffin, déi och Schäffen an der Gemeng Beetebuerg ass, huet däitlech gemaach, dass si géint déi geplangten Jughurtsfabréck vu Fage ass, well et net responsabel wier, dass do e Waasserverbrauch invoquéiert gëtt, deen esou héich wier, wéi dee vun enger Gemeng mat 20.000 Awunner. Derbäi kéim eng Politik, fir engem Betrib schonn Terrainen ze verkafen, deen emol nach keng Autorisatiounen hat, fir sech néierzeloossen.

Beim Dossier Datacenter vu Google zu Biissen huet sech d'Josée Lorsché méi virsiichteg ausgedréckt. Do misst een emol d'Resultater vu sämtlechen Oploen a Prozeduren ofwaarden. Et wier elo nach ze fréi, fir do konkret Positioun ze bezéien.

Et wier awer och kloer, sou d'Josée Lorsché, dass Déi Gréng sech der Entwécklung vun eiser Wirtschaft net wéilte verschléissen. Et wier een eben an enger Koalitioun, an do misst een eben dann och Kompromësser agoen. D'Land moderniséieren, andeems dass verstäerkt op Digitalisatioun gesat gëtt, dat géifen Déi Gréng awer voll ënnerstëtzen.

AUDIO: Invité vun der Redaktioun: Josée Lorsché

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.