Wéi geet et bei de Pirate weider? De Grënner an Deputéierten war eisen Invité vun de Redaktioun en Donneschdeg de Moien.

"Et ass sécherlech e Problem. Ob et e grousse Skandal ass, wou ee muss eng parlamentaresch Enquête-Kommissioun asetzen, dat ass vläicht momentan nach mat Kanounen op Spatzen geschoss." Déi Ausso kënnt vum Sven Clement, deen en Donneschdeg eisen Invitée vun der Redaktioun war.

Et ass eng Reaktioun op d'Polemik ronderëm den ominéise Police-Register. Op alle Fall wier et eng Fro vum Dateschutz, déi muss opgekläert ginn.

D'Leit hätten e Recht drop gewuer ze ginn, wat de Staat iwwert si späichert a woufir déi Informatioune benotzt ginn, sot den Deputéierten vun de Piraten. Et misst een elo mol ofwaarden, wat sech an deen Dossier ergëtt.

Wat d'Stëmmung an der Piratepartei ugeet, vun där gesot gëtt, se wier net déi allerbescht, sot de Sven Clement, datt et normal wier, datt et an enger Partei zu klenge Reiwereie kënnt. Wéi iwwerall géif et Leit ginn, déi méi oder manner gutt matenee kéinten. Grouss Streidereie géif et keng ginn, mengt de Sven Clement. Elo, mat e bësse Recul, misst jiddereen nees bei sech fannen.

Nach ass net decidéiert, wéini den nächste Kongress ass. Och net wien den nächste Coordinateur gëtt, aktuell ass dat den zweeten Deputéierte vun de Piraten, de Marc Goergen. Dem Sven Clement no, wär et am beschten, de Kongress no der Summervakanz ze maachen, also am Hierscht.

D'PID huet jo dann d'Zesummenaarbecht mat de Pirate gekënnegt. De Sven Clement ass dat iwwert e Push vun RTL an der Päischtvakanz gewuer ginn. Dat wär ganz schlechte Stil, besonnesch wann een de Piraten eng schlecht Kommunikatioun géif virgeheien, sou den Deputéierte vun de Piraten en Donneschdeg de Moien am RTL-Interview.

AUDIO: Invité vun der Redaktioun: Sven Clement

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.