E Freideg de Moie war den Direkter vun der Handelsconfederatioun clc eisen Invité vun der Redaktioun.

„Et misst opgoen, datt jidderee säi Stéck vum Kuch kritt. Et muss een natierlech dem Client eppes bidden“. Dat sot den Direkter vun der Handelsfederatioun – den Nicolas Henckes - um Freideg de Moien als eisen Invité vun der Redaktioun.

Op der Cloche d'Or huet jo elo de gréisste Shoppingzenter vum Land opgemaach, dat huet sécher en Impakt op aner Butteker, mengt den Nicolas Henckes. Dat géif een iwwerwaachen. Zesumme mam Royal Hamilius géife quasi op ee Coup 100'000 Metercarré Akafsfläch bäikommen. Dat misst ee mat Liewe fëllen. Nach wär net kloer wéi d'Equilibere sech opstellen.

Den Direkter vun der Handelskonfederatioun huet awer och betount, datt d'clc kee Steierungpouvoir huet, dat hätt keen. Et wär e fräie Marché an d'Konkurrenz géif d'Geschäft beliewen.

Wat dann d’Stad Lëtzebuerg ugeet, mengt de Nicolas Henckes, datt déi nächst zwee Joer bedéngt duerch de Chantier vum Tram méi sauer wäerte ginn. Dono awer hätt d’Stad Lëtzebuerg eng flott a modern Zukunft, wou net méi just an enger Strooss, mä vill méi verdeelt kéint „geshoppt“ ginn.

AUDIO: Invité vun der Redaktioun: Nicolas Henckes

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.