En Dënschdeg de Moie war den Educatiounsminister eisen Invité vun der Redaktioun.

"Ech verlaange jo net, dass jiddereen alles gutt fënnt, wat mer maachen... Ech hätt gären en oppenen Dialog, dee mer solle féieren." Dat sot de Claude Meisch en Dënschdeg de Moien als eisen Invité vun der Redaktioun.

Den Educatiounsminister huet dobäi op déi deels ganz negativ Resultater vun enger rezenter Ëmfro ënnert den Enseignante reagéiert.

Vill Schoulmeeschteren a Léierinnen hunn dobäi gesot, dass si sech iwwerfuerdert an hirem Beruff fillen a kengem Jonke géifen uroden, fir Enseignant wëllen ze ginn.

Et wiere Resultater, déi ee géif ganz eescht huelen, sot de Claude Meisch, deen den Ausdrock vun engem Malaise am Schoulsystem esou awer net wollt gëlle loossen. Eng generell desastréis Situatioun an der Grondschoul confirméiert den Educatiounsminister net. Hie wier vill an de Schoulen ënnerwee gewiescht an de leschte 6 Méint an hien hätt do och vill Zouversiicht erlieft.

Schoul halen, wier hautdesdaags eben net méi dat selwecht wéi nach virun enger Generatioun.

Hie wier sech bewosst, dass et eng Partie Defie géif ginn, déi een am gaangen ass, unzegoen, respektiv déi schonn ugaange wier, ma wou een d’Reformen awer och mol misst gräife loossen.

Dass d’Enseignanten haut mat ze vill administrativem Opwand geplot wieren, dat soll iwwerdeems eng nei Task-Force analyséieren, wou all Acteur, also och d'Gewerkschaften mat agebonne ginn. Villes kéint een haut awer net méi informell reegelen, mä misst dokumentéiert ginn.

Wat de Minister net wëll stoe loossen, dat ass, datt d'Enseignante fäerte missten, fir sech ze Wuert mellen. Hie géing déi beschriwwen negativ Haltung vis-à-vis vun de Regionaldirektiounen um Terrain och net mierken.

AUDIO: Invité vun der Redaktioun: Claude Meisch

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.