E Mëttwoch de Moie war de Landwirtschaftsminister Romain Schneider eisen Invité vun der Redaktioun.

An der Zone Blanche, déi wéinst der Schwéngspescht laanscht déi belsch Grenz ageriicht gouf, ass nach kee Schwäin geschoss ginn, respektiv et ass nach keng Primm vun engem Jeeër ugefrot ginn. Dat sot de Landwirtschaftsminister Romain Schneider e Mëttwoch de Moien, hie war eisen Invité vun der Redaktioun.

Bis Enn September soll déi Pufferzon awer "wäiss" sinn, also kee Wëllschwäin méi do sinn. Dofir wäerten do och Falen opgestallt ginn. Et soll och gekuckt ginn – weider zesumme mat de Jeeër – fir méi aktiv ze schéissen.

Déi afrikanesch Schwéngspescht ass nach net zu Lëtzebuerg. 202 Schwäi goufe bis ewell kontrolléiert, all d'Tester waren negativ.

AUDIO: De Romain Schneider

Den Zonk laanscht déi belsch Grenz steet. E gouf zesumme mat der Gemeng Käerjeng erweidert a verbessert, huet de Romain Schneider präziséiert. Et wier een och prett, fir den Zonk iwwert déi Zon eraus Richtung Norden z'erweideren. Et misst ee preparéiert sinn, wann d'Wëllschwäin iwwer d'Autobunn géife kommen, fir da séier ze reagéieren. Et hätt een aus dem 1. Zonk geléiert, fir scho virdru mat de Leit an de Gemengen um Terrain ze schwätzen, sou de Lëtzebuerger Landwirtschaftsminister.

De Romain Schneider ass jo och Sozialminister. Hien huet confirméiert, datt d'nächst Woch eng Reunioun ass mat allen Acteuren iwwer d'Nomenclature am Gesondheetssecteur. Déi Nomenclature, wou all d’Tariffer vun de medezinesche Leeschtunge festgehale sinn, déi en Dokter ka verrechnen an d’Gesondheetskeess rembourséiert, ass jo vereelzt. D'Doktere boykottéieren zanter engem Joer d'Nomenclature-Kommissioun. D'nächst Woch wëll an hofft een eng Léisung ze fannen, sot de Romain Schneider. Hie wäert sécher Ouverturë maachen, fir datt ee weider kënnt.

AUDIO: Invité vun der Redaktioun: Romain Schneider

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.