E Freideg de Moie war de Buergermeeschter vun Esch eisen Invité vun der Redaktioun.

Eng Revalorisatioun vum Escher Zentrum ass néideg an d'Gemeng géing mat enger ganzer Rei
Mesuren dru schaffen, seet den Deputé-Maire Georges Mischo, hie war e Freideg de Moien Invité vun der Redaktioun."Ee vun de Schlësselen ass et, fir de Belval mam Zentrum vun Esch un ze bannen".

D'Uelzechtstrooss gëtt zum Beispill méi gréng gemaach, fir eidel Commercë soll no Léisunge gesicht ginn an et muss ee Geschäfter ulackelen, déi et net och soss iwwerall gëtt. Dofir gëtt och e Leerstands-Management gemaach.

D'Kritiken un Esch wëll de Buergermeeschter och net all gëlle loossen, et géif net ëmmer manner ginn zu Esch an et wier och net esou, datt et an der Minette-Metropol keng Kafkraaft géing ginn.
Och d'Sécherheetslag an der Stad hätt sech verbessert, der Police no wieren d'Zuele vun den Doten erofgaangen, et géing een awer weider dru schaffen, ënner anerem gi Reunioune mat de Bierger organiséiert.

Zanter e puer Wochen gëtt et op der Escher Grenz ewell jo och dat neit Konzept vum Wiki Beach. Eng Lounge a Concerts-Plaz ënner fräiem Himmel, wat och zu enger Studenteplaz géif bäidroen, seet de Georges Mischo.  E Méindeg wéilt een zesummen mat de Gemengeservicer an der Police en éischten De-Briefing maachen, fir ze kucken wat een eventuell nach kéint verbesseren, vläicht och wat d’Lautstäerkt vun der Musek ugeet.

Wat d'Zukunft vum Ciné Ariston ugeet, huet de Georges Mischo nach emol confirméiert, dass een am gaang wier als gemeng de Kino vun den oeuvres paroissales of ze kafen. D'Gemengeservicer géifen drop schaffen. Virgesinn ass jo e Kanner- a Jugendtheater draus ze maachen.

Datt Esch keng Studentestad wier, dat wëll de Buergermeeschter Mischo net esou stoe loossen. D'Uni wier eréischt zënter 2015 do an et een där Saach och Zäit ginn. Ganz wichteg wier an deem Kontext en Trëppel- a Veloswee, deen elo amenagéiert soll ginn an deen de Belval mam Stadzentrum verbënnt

Bis Enn Juli kënnen d'Projeten eragereecht ginn, fir d'Kulturhaaptstad „Esch 2022“. D'Politik géing sech aus dem Programm eraus halen, esou den Escher Buergermeeschter. Wat hien awer ka soen, ass, datt scho flott Saachen erakomm wieren.

Bis ewell goufen 10 Leit agestallt, bis d'Enn vum Joer sollen et der 25 sinn. De Georges Mischo bedauert, datt „Esch 2022“ zum Politikum ginn ass, ma elo wier Rou am Dossier, et wier op alle Fall e Projet, deen d'Stad an d'Regioun no vir brénge soll an och wäert.

AUDIO: Invité vun der Redaktioun: Georges Mischo