E Méindeg de Moie war déi éischt Fra un der Spëtzt vun der JHL eis Invitée vun der Redaktioun.

Den Terrain bleift e grousse Problem fir jonk Handwierker, genee wéi fir jonk Leit am Allgemengen, dat sot e Méindeg de Moien eis Invité vun der Redaktioun.

D'Alexa Ballmann ass déi nei Presidentin vum JHL, Jonk Handwierk Lëtzebuerg.

Et dierft een net vergiessen, dass dacks hannert engem jonke Betrib och ee jonke Proprietär steet, deen de Präis vu sengem eegenen Terrain, respektiv senger eegener Immobilie net méi kéint bezuelen. Domat wär d'Zukunft vu jonken Handwierker net méi sou geséchert, erkläert d'Alexa Ballmann.

Donieft wär natierlech de Manktem u qualifizéiertem Personal e grousse Problem. Handwierk wär nach ëmmer relativ „ënneschte Niveau“, am Lycée Classique oder Technique misst ee fir d'éischt mol e puer Niveauen erofgoen, fir en Handwierk ze léieren, sou d'Presidentin vum JHL. D'Handwierksléier huet nach ëmmer e schlechten Numm a gëtt als Echec ugesinn ... dat misst sech änneren.

E weider Problem wär och nach ëmmer, dass d'Patrone vill jonk Leit ausbilden, déi dann awer bei de Staat wiesselen. Dat wär awer ze verstoen, wann een wéisst, dass et fir déi Jonk do net just méi Salaire, ma och 10 Deeg méi Congé gëtt.

Natierlech wär et do schwéier matzehalen. Ma et géing och schonn an de Federatiounen iwwer Léisungen diskutéiert ginn. Zum Beispill kéint e gudde Patron fir d'Ausbildung vum Employé bezuelt ginn. Am Futtball wär et jo net anescht. E Veräin géing Zäit a Geld an d'Ausbildung vun engem Spiller investéieren, wann deen da bei een anere Club wiesselt, géing bezuelt ginn. Sou kéint zum Beispill een Usaz ausgesinn, erkläert d'Alexa Ballmann.

AUDIO: Invité vun der Redaktioun: Alexa Ballmann

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.