En Dënschdeg de Moie war d'Blanche Weber, d'Presidentin vum Mouvement écologique Invitée vun der Redaktioun.

Et ass gutt, dass de Premier Xavier Bettel d'Ëmwelt a senger Ried op Nationalfeierdag ugeschwat huet, mä d'Realitéit um Terrain zu Lëtzebuerg gesäit net gutt aus. D'Presidentin vum Mouvement Ecologique Blanche Weber huet e Méindeg de Moien am RTL-Interview vu "grondsätzlechen Defiziter" geschwat. Lëtzebuerg hätt nach ëmmer den héchsten CO2-Ausstouss pro Kapp an der EU a mir wären net de Musterschüler, wéi de Premier eis dacks géing duerstellen, sou d'Presidentin vum MouvEco.

Sou laang een net op de Fong vum Problem géing agoen, heescht de Wuesstem, géing een och net weider kommen. An iwwer de Wuesstem géing awer zanter de Walen net méi geschwat ginn. Jiddereen, deen am Stau steet, an engem iwwerfëllten Zuch sëtzt, jiddereen, dee wëll een Haus kafen oder eppes lounen, gesäit de Wuesstem an driwwer geschwat gëtt net, sou d'Blanche Weber. De Message wär awer bei de Leit ukomm, dass een net kéint esou virufueren.

Eng aner Saach, un där sech d'Presidentin vum MouvEco stéiert, ass, dass nach ëmmer net iwwer eng nohalteg Steierreform géing diskutéiert ginn. D'Steierpolitik wär blann um ökologeschen An, awer genee do misst ugesat ginn.

Aarbecht- a Sozialsystem géingen nach ëmmer méi besteiert ginn, wéi den Ëmweltverbrauch. Eenzel Mesurë wieren zwar gutt a wichteg, mä soulaang een net un de Fong vum Problem géif goen, nämlech de staarke Wuesstem, géif sech Näischt änneren.

Ob déi Gréng an der Regierung gebremst ginn, kéint si net aschätzen. D'Blanche Weber vermësst awer eng lieweg Diskussioun bannent der Koalitioun. All Minister géing op sengem Terrain schaffen a kee wéilt deem aneren draschwätzen, an dat wär e Problem, sou eis Invitée vun der Redaktioun.

De Mouvement Ecologique begréisst, datt eppes a Saachen ëffentlechen Transport a Mobilité douce gemaach gëtt. An awer hätt Lëtzebuerg nach ëmmer deen héchsten C02 Ausstouss pro Kapp an Europa. D'Hausse beim Bensinspräis géif hei net duergoen. Dat wier keng effikass Moossnam. Dat wier Sand an d' Ae vun de Leit gestreet.

AUDIO: Invité vun der Redaktioun: Blanche Weber

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.