E Freideg de Moie war de President vun der FGT eisen Invité vun der Redaktioun.

Zanter November gëtt et am Handwierkssecteur am Land eng nei Federatioun, nämlech d’FGT – d’Federatioun vum Genie technique.

3 Federatioune goufen hei zesummegeluecht, Entreprisen aus de Beräicher Elektresch, Chauffage-Sanitäre an Informatik.

Dat neimoudescht Bauen hätt gewisen, dass déi 3 Beruffsgruppen ëmmer méi enk um Chantier missten zesummeschaffen, sot e Freideg de Moien de Marc Thein als eisen Invité vun der Redaktioun.

Hien ass den éischte President vun der FGT, an huet sech selwer e bëssen erstaunt gesot, wéi einfach déi Fusioun iwwert d’Bühn gaange wier.

De gesonde Mënscheverstand hätt hei gespillt, a Lëtzebuerg wier doranner nees eng Zort Virreider.

D’FGT regroupéiert elo eng ronn 450 Memberen, mat iwwer 12.000 Salariéen.

E hätt ee sech dem Marc Thein no 4 Pilieren gesat op deenen ee wéilt schaffen:
- Engersäits zesumme Stäerkt weisen, fir de Beruff weider ze bréngen.
- E Gudde Marketing fir ze weise wat een alles kéint.
- Formatioun fir d’Salariéen an de Betriber, Stéchwuert Digitalisatioun.
- A véiertens wéilt ee méi Reklamm fir déi eenzel Beruffer bei de Jonken maachen, well een nach ëmmer géif mierken, dass d’Handwierk weiderhin heiansdo als de Stoussnéckel vun der Gesellschaft géif duergestallt ginn.

AUDIO: Invité vun der Redaktioun: Marc Thein

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.