E Freideg de Moie war de President vun der Bauerenzentral, de Marc Fisch eisen Invité vun der Redaktioun.

Wéi gesäit d'Landwirtschaft vu Muer aus?

Am Kader vun der Foire agricole hu mer déi Fro um Freideg de Moien dem President vun der Bauerenzentral, Marc Fisch gestallt.

Datt een an Zukunft 100% Bio ka produzéieren, gesäit de Marc Fisch méi ewéi skeptesch.

Vun der rezenter Debatt an der Chamber behält hien zeréck, datt d'Bio-Diskussioun plazeweis ze ideologesch gefouert géife ginn en et géif sech net genuch op Fakte baséiert ginn.

D'Ziler wieren net ze erreechen, well um Maart net genuch Bio-Produiten ofgesat géife ginn. Am Beräich Bio-Fleesch a Bio-Mëllech géif et zu Lëtzebuerg eng Iwwerproduktioun ginn.

Uebst a Geméis kéint iwwerdeems am Ausland vill méi bëlleg produzéiert ginn, dofir wier dëst just bedéngt eng Alternativ.

Dem Lëtzebuerger Bauer géing et allgemeng net schlecht.

De Beruff vum Bauer wier awer en anere ginn, en ass virun allem vill méi technologiséiert, et gëtt eben net méi just mat den Hänn geschafft.

Och d'Oploe géingen ëmmer méi strikt ginn, dat kéint een zwar verstoen. Ma am Ëmweltberäich kéimen ëmmer méi onrealistesch Reegelungen, déi de Bauer ënner Drock setzen an him d'Aarbecht schwéier maachen, sou de Marc Fisch. Hie vermësst op där Plaz den Dialog, et géinge vill Decisioune vun Uewen erof geholl ginn

Allgemeng bedauert de President vun der Bauerenzentral, datt de Bauer dacks zu Onrecht un de Pranger gestallt géif a seng Aarbecht net valoriséiert géif ginn.

AUDIO: Invité vun der Redaktioun: Marc Fisch

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.