E Mëttwoch de Moie war den Ex-CSV-President Marc Spautz eisen Invité vun der Redaktioun.

D'Aktioun vun en Dënschdeg an der Chamber war fir en Zeechen ze setzen. Nee, et wär net déi nei Oppositiounskultur, sot de Marc Spautz, fréieren CSV-President, e Mëttwoch de Moien als eisen Invité vun der Redaktioun. Hie weist sech och iwwerrascht, datt elo gesot géif ginn, dat wär eng Première. 2012 hätten och déi Gréng an anerer de Sall verlooss. Dës Kéier wär awer keng Majoritéit méi do gewiescht, fir ofzestëmmen.

Et hätt een en Dënschdeg d'Gefill gehat, datt verschidden Deputéiert hiert Chamber-Reglement net kennen. Den Tëppel op den "i" hätt de Premier gesat, wéi e méi spéit an der Chamber sot, hien hätt kee Problem an d'Chamber ze kommen an d'Majoritéit hat awer een domadder. De Marc Spautz freet sech, ob dann elo dës Woch de Xavier Bettel an Parlament kënnt fir Froen ze beäntwerten. Oder ob d'nächst Woch nach eng Sëtzung ass.

Och ënner CSV-Responsabilitéit gouf et jo déi Datebanken, iwwer déi elo gestridde gëtt. Mä mir hunn haut en neit Dateschutz-Gesetz, sou de Marc Spautz. All Asbl géif souzesoe schikanéiert ginn a bei der Police etc. géif weidergemaach gi wéi bis ewell. Et kéint een net Gesetzer maachen a sech selwer net drun halen.

Op d'Resultat vun den Europawalen ugeschwat, huet den CSV-Deputéierte gemengt, et hätt ee verschidde selwecht Feeler bei deene Wale gemaach, wéi scho bei de Chamberwalen zejoert. Zum Beispill net genuch Präsenz gewisen.

Iwwer den neie Moment zur Verfassungsreform huet de Marc Spautz präziséiert, et hätt nei Evenementer ginn. Ënnert anerem misst elo iwwer Problemer mat der Justiz diskutéiert ginn. An de Premier selwer hätt d'Diskussioun iwwer en neit Walgesetz lancéiert. Dofir wär d'CSV der Meenung, et misst ee bei d'Leit goen, fir mat hinnen ze schwätzen.

AUDIO: Invité vun der Redaktioun: Marc Spautz

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.