E Méindeg de Moie war de grénge Minister Invité vun der Redaktioun.

Wat mam Felix Braz geschitt, ass fir mech ganz schwéier ze erdroen, dat seet de François Bausch.

Och wann hien natierlech keng medezinesch Spekulatioune géing maachen, géif den Häerzinfarkt vum grénge Ministerkolleg een allgemeng un d'Nodenke bréngen, wat de Pensum an de Stress vun engem Regierungsmandat ugeet. Politik wier haart an d'Ministere géingen dacks net genuch no sech kucken, esou de François Bausch.

Trotzdeem muss dat politescht Rad weider dréien. D'Sam Tanson iwwerhëlt jo de Justizressort temporär a kritt déi voll Kompetenzen. Et misst een da vu Woch zu Woch kucken, wéi et weider geet.

De Vizepremier mécht den LSAP-Minister Etienne Schneider bis op Weideres eleng, och wann de François Bausch sech ëm d'Coordinatiouns-Aufgab këmmert.

Wat déi politesch Lee fir d'Rentrée ugeet, wier d'Bestandsopnam am Dossier Fichier central souwäit ofgeschloss. Et wier schonn ee Gesetz quasi fäerdeg an zwar dat vun der Kameraiwwerwaachung, sou de Policeminister. Hie selwer géing direkt no der Rentrée an déi zoustänneg Chamberkommissioune goen, fir iwwer de sougenannte Contrôle des antécédents ze informéieren.

Wat de Ressort Transport ugeet, gëtt d'Testphas vu 90km/h op Deeler vun der Autobunn elo ausgewäert. Dat soll afléissen an e ganzt Konzept fir nei Méiglechkeeten an de Spëtzestonnen ze schafen, mat Bussen a mat Fuergemeinschaften.

De Radar tronçon op der Iechternacher Streck ass den Ament an der Testphas. D'Donnéë géifen elo nach alleguer geläscht ginn. Vum neie Joer u soll de Streckeradar tëscht dem Waldhaff a Gonnereng dann definitiv funktionéieren.

Bei Flich gëtt iwwerdeems d'Passagéiertax vun 3,79 Euro op 7,5 Euro eropgesat. Dat wier keng C02-Steier, sou de François Bausch. De Fluchhafe misst sech selwer finanzéieren. Dat hei wier eng einfach Upassung, Lëtzebuerg hätt hei bis ewell déi nidderegst Steier an Europa gehat.

AUDIO: Invité vun der Redaktioun: François Bausch

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.