En Dënschdeg de Moie war den LSAP-Süd-Deputéierten eisen Invité vun der Redaktioun.

"Ech wëll den Deputéierte stäerken. Mer brauchen an der Chamber méi Moyenen, souwuel personeller, wéi finanzieller, fir eis Aarbecht nach méi performant a konsequent kënnen ze maachen."

Dat sot de Georges Engel en Dënschdeg de Moien als eisen Invité vun der Redaktioun.

Den Deputé-maire vu Suessem wäert d’nächst Joer op den 1. Januar d’Presidence vun der LSAP-Fraktioun vum Alex Bodry iwwerhuelen. Dëse bezeechent hien iwwerdeems als een, wann net souguer de beschten Deputéierten an der Chamber.

Méi Leit an de Fraktiounen, fir dass d’Deputéiert nach besser preparéiert wieren, doriwwer mengt de Georges Engel, dierft et och Partei-iwwergräifend e Konsens ginn.

Fir hie wier et elo wichteg, sech weider an déi verschidden Dossieren anzeliesen, op deenen d’LSAP-Deputéiert schaffen, well et als Fraktiounschef wichteg wier, en Iwwerbléck ze hunn.

Seng Partei, d'LSAP, wier e bëssen eng „alte Dame“ esou de Georges Engel, ma si wäert ganz modern an dynamesch ginn.

An de nächste Méint wéilt de Georges Engel iwwregens decidéieren, ob hie Suessemer Buergermeeschter bleift, wann hie bis Fraktiounschef ass. Hie wier sech bewosst, dass et enorm vill Aarbecht wier, déi deen Ament géif op hie waarden. Hie wéilt sech dofir Gedanken maachen, a seng Decisioun da mat Zäite matdeelen. Am Suessemer Schäfferot sinn nach d'Simone Asselborn-Bintz (LSAP), d'Nathalie Morgenthaler (CSV) an de Marco Goelhausen (LSAP).

Als President vun der parlamentarescher Kommissioun fir Aarbecht a Securité sociale sot de Georges Engel iwwerdeems och, dass et am Dossier vum „Tiers payant généralisé“ den Ament esou wier, dass et un der technescher Ëmsetzung géif hänken. Et misste Programmer geschriwwe ginn, fir eng einfach Ofrechnung vum Dokter ze erméiglechen. Hie wier awer ganz zouversiichtlech, dass dat géif klappen, wollt sech awer zäitlech haut net festleeën. En anere wichtege Sujet wier d'Reform vun der Inspection du travail et des mines, déi den Ament net sou kéint schaffen ewéi se misst.

Fir déi faarweg Strooss virun der Suessemer Schoul wäert eng Léisung mam Ministère fonnt ginn, ass de Georges Engel iwwerzeegt.

Wéinst dem Contournement Käerjeng gouf laang mat der Nopeschgemeng gestridden.
D'Decisioune fir ze baue wier lo geholl an d'Chance datt een nach eppes kann ännere wier ganz kleng, seet de Suessemer Buergermeeschter, iergendwann misst et dann och gutt sinn.

AUDIO: Invité vun der Redaktioun: Georges Engel

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.