E Méindeg de Moie war den Educatiounsminister Claude Meisch eisen Invité vun der Redaktioun.

"Ech denken, dass d’Regierung genee esou eng Politik mécht." Dat ass d’Reaktioun vum Claude Meisch op d’Fro, ob Eltere méi Zäit solle kréie fir hir Kanner.

Den Educatiounsminister war um Méindeg um Dag vun der Rentrée eisen Invité vun der Redaktioun.

Et wier och eng Saach vum Choix, deen d’Eltere fir sech missten huelen, op si et sech leeschte kéinten, fir vläicht och manner ze schaffen, an deen Ament méi fir hir Kanner do ze sinn.

Der Politik hir Aufgab wier et, fir deem Choix déi néideg Méiglechkeeten ze ginn.

Et sollt een iwwerdeems net generaliséieren a soen, dass d'Kanner hautdesdaags net méi fokusséiert an dacks iwwerfuerdert wieren.

Et géif sou Fäll natierlech ginn, mä et wier dem Claude Meisch no, kee generelle Phänomen.

Fir 2021 huet de Minister iwwerdeems eng grouss Reform vun de Cheques servicen annoncéiert, wou de System den Ament net ideal géif funktionéieren.

Dass seng Initiativ vun de Mini-Crèchen bis ewell nach keen immense Succès wier, doriwwer wier de Claude Meisch selwer verwonnert. Et kéint sinn, dass hei d’Critèren ze streng wieren. Vun der Basis-Iddi wier hien awer nach ëmmer iwwerzeegt.

AUDIO: Invité vun der Redaktioun: Claude Meisch