E Mëttwoch de Moie war den Directeur adjoint vun der Police Lëtzebuerg eisen Invité vun der Redaktioun.

An den nächsten 3 Joer gi bei der Police eng 850 nei Plaze geschaaft. Am Interessi vun de Bierger, fir méi Präsenz um Terrain ze weisen.

"Präsenz gëtt Sécherheetsgefill. Dofir wier et wichteg, dass mer och weiderhi verstäerkt dobaussen ënnerwee sinn". Dat sot den Donat Donven e Mëttwoch de Moien als eisen Invité vun der Redaktioun.

Den Directeur-adjoint vun der Police huet zouginn, dass een den Ament wierklech e Manktem u Beamten hätt. Derbäi kéim e relativ groussen administrativen Opwand. Dëse misst bäibehale ginn, mä iwwert déi genee Form an d'Handhabung misst een nodenken. Ziviliste kéinten hei an Zukunft en Deel iwwerhuelen, fir de Polizist bei senger Charge z'entlaaschten.

Zum Droge-Problem op der Stater Gare sot den Donat Donven, dass een hei scho Villes gemaach hätt, mä dass de Problem ze léisen nëmme ganz schwiereg ze realiséieren wier. Handfest Beweiser sinn néideg an dat kascht Zäit.

Do wou eng Demande ass, wier ëmmer och eng Offer. D'Police misst repressiv virgoen, andeem een op der enger Säit Präsenz an Uniform weist an zweetens och zivil ënnerwee ass.

De Beruff vum Polizist jugéiert den Directeur-adjoint iwwerdeems weiderhin als e ganz Attraktiven. Et hätt een am Laf vun enger Carrière ganz vill Méiglechkeeten, beispillsweis och sech ze spezialiséieren.

De Respekt virun de Beamten huet awer ofgeholl. Dat geet vu Frechheete bis hin zu Gewalt.

Invité vun der Redaktioun: Donat Donven

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.