En Donneschdeg de Moie war de President vun der kommunistescher Partei Lëtzbuerg eisen Invité vun der Redaktioun.

Et mierkt een, dass et wéi an engem Krabbekuerf ass, wou jiddereen deem anere säin Däiwel ass. Esou huet den Ali Ruckert den Donneschdeg de Moien als eisen Invité vun der Redaktioun d’Situatioun am Déifferdenger Gemengerot beschriwwen, dat no der Affär Traversini. Fir de President vun der KPL an Déifferdenger Gemengerot ass et kloer, dass hei vun Ufank un eng Hexejuegd op eng Persoun gemaach gouf.

Vu vir era wier hei just op eng Putsch-Méiglechkeet vun der lokaler DP an der LSAP gehofft ginn.

Dass de Roberto Traversini Feeler gemaach hätt, wier kloer an dat wier och ze kritiséieren. Mä d’Manéier, wéi hei verfuer gouf, géif déif blécke loossen, sou den Ali Ruckert, deen hofft, dass d’Koalitioun elo hire Programm weiderféiert an dobäi méi op d’Oppositioun lauschtert, am Sënn vun den Déifferdenger Bierger.

Hie jugéiert iwwerdeems d’Positioun vun der neier Buergermeeschtesch zu Déifferdeng als ganz schwiereg. Si misst et fäerdegbréngen, Rou an d’Märei ze bréngen, wat net einfach dierft ginn.

De 70. Anniversaire vun der Volleksrepublik China ugeschwat, do sot de KPL-President, datt de sozialisteschen Entwécklungswee seng Friichte géif droen, dat trotz ville Widderspréch.

Invité vun der Redaktioun: Ali Ruckert

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.