En Donneschdeg de Moie war ee vun den Architekte vum Fonds Kirchberg eisen Invité vun der Redaktioun.

De Kierchbierg soll an Zukunft ganz anescht valoriséiert ginn, wéi dat haut de Fall ass, als grouss Betonswüst ouni vill Liewen.

Ee vun den Architekte vum Fonds du Kirchberg, de Matthias Pinter war en Donneschdeg de Moien eisen Invité vun der Redaktioun, an huet erkläert, dass alles soll méi lieweg ginn, mat neie Wunnflächen, enger verbesserter Mobilitéit, déi manner op den Auto, dofir méi op den Tram an de Vëlo setzt, an enger genereller Valorisatioun vun Plazen, déi méi gréng solle ginn.

Um Kierchbierg gëtt den Ament méi geschafft wéi gewunnt. Et gëtt vill grouss Gebaier, de Charakter ass net dee selwechte wéi an enger historescher Stad.  Mat enger neier Strategie soll den ëffentleche Raum am Quartier méi lieweg gemaach ginn. Stroosse, Plazen a Parke sollen opgewäert ginn.

De Fonds Kirchberg an den Infrastrukturministère schaffen do mam däneschen Architektebüro Gehl zesummen. Déi generell Philosophie vun der Strategie ass déi fir keng reng Büroszonen méi ze hunn, mä méi Mixitéit ze kréien, méi Wunnengen, méi Commercen, méi gréng Flächen a méi Sëtzplazen ze schafen.

Ënner anerem laanscht d'Tramslinn solle Plaze reamenagéiert ginn, beim Arrêt Coque sinn zum Beispill gréisser Changementer geplangt. Bei där genannter Coque kéint dann och eng oppe Schwämm entstoen. Op d'mannst wier dat eng Iddi vum Architektebüro, déi gutt ukéim. Ob dee Projet wierklech realiséiert gëtt ass awer zu dësem Abléck nach net ze soen.

De Vëlosreseau soll weider ausgebaut ginn. Den Auto soll um Plateau an Zukunft kee sou e grousse Stellewäert méi hunn.

Datum- a Budgetsméisseg wier et schwéier sech festzeleeën. Op alle Fall léich d'Prioritéit elo drop, fir um Kierchbierg Wunnraum ze schafen, sou nach de Matthias Pinter

Den Owend ëm 19 Auer gëtt déi nei Strategie am Tramsschapp um Lampertsbierg presentéiert.

Invité vun der Redaktioun: Matthias Pinter

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.