E Mëttwoch de Moie war de President vun der "Chambre d'Agriculture" eisen Invité vun der Redaktioun.

Ob d’Politik ze gréng ass, weess ech net, mä et mierkt een, dass d’Diskussioun ganz séier derapéiert an et gi Saachen an den Zesummenhang bruecht, déi net an Zesummenhang stinn.

Dat sot de Guy Feyder de Mëttwoch de Moien als eisen Invité vun der Redaktioun.

De President vun der Chambre de l’Agriculture fënnt net, dass d’Landwirtschaft groussaarteg Schold um Klimawandel wier. Op d’mannst emol déi Lëtzebuergesch net.

Den Agrarsecteur géif mëttlerweil fir quasi alles attackéiert ginn, mä just e Brochdeel vun de Kritike wiere wierklech nozevollzéien.

Et wéilt een awer säin Deel derzou bäidroen, fir ze kucken, wou een an Zukunft kéint Emissiounen aspueren.

Dofir wier d’Landwirtschaftskummer och am Gaang, e Positiounspabeier auszeschaffen, dat een dono dem Ministère wéilt iwwerreechen. Et misst een dat awer realistesch gesinn, eng "marge de manoueuvre" wier do, mä d’Limitte wiere relativ enk, sou de Guy Feyder, dee weider nach keng Detailer aus deem Positiounspabeier konnt liwweren. "Dofir wier et nach e bëssi fréi." Dat Dokument soll Mëtt November fäerdeg sinn. Komplett op planzlechen Ubau ëmstellen, wier zu Lëtzebuerg awer net méiglech, sou de President vun der Landwirtschaftskummer weider.

Op d'mannst 20% Bio-Landwirtschaft bis 2025? Dat ass dem Guy Feyder no kee realistescht Zil, d'Demande wier nach net grouss genuch, esou datt d'Baueren zécken, fir op de Bio-Wee ze goen. Hei misst dee richtege Kader gesat ginn. Do hofft een op den Aktiounsplang iwwer d'Biolandwirtschaft, dee gëtt den Ament vum zoustännege Minister Romain Schneider ausgeschafft.

Invité vun der Redaktioun: Guy Feyder

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.