E Méindeg war d'Ministesch fir Konsumenteschutz eis Invitée vun der Redaktioun.

D'Successioun vum Etienne Schneider als Wirtschafts-a Gesondheetsminister ass offiziell an der LSAP nach keen Thema. Den Ament wären et Couloirs-Gespréicher, sou huet d'Paulette Lenert d'Gerüchter kommentéiert, dat si als Ministesch kéint d'Ressorte vum Etienne Schneider iwwerhuelen, wann deen dann ophält.

An de Kulisse géif vill geschwat ginn. „Loosse mer mol de Laascht kommen“, huet déi aktuell Konsumenteschutz- a Kooperatiounsministesch gemengt. Et géif een an der Partei eréischt richteg driwwer schwätzen, wann en Datum steet.

Den Etienne Schneider hat virun enger Zäit confirméiert, datt hie wéilt fréizäiteg als Minister ophalen. Hien hat sech an der Vergaangenheet jo derfir staark gemaach, datt een als Minister no 10 Joer soll ophalen. Dat wär bei him spéitstens am Februar 2022 de Fall.

D'LSAP-Ministesch huet de Moien och op d'Email-Geschicht vun der Familljeministesch Corinne Cahen reagéiert. A Priori wär et net de grousse Scoop. Et wär gewosst, datt d'Corinne Cahen sech fir de Familljebetrib asetzt. Et misst ee sech froen, ob et glécklech wier, datt si d'Mail als Ministesch gemaach hätt. En Interessekonflikt gesäit d'Paulette Lenert awer net.

Déi nächst 2 bis 3 Woche sollen d'Gespréicher, mat ënnert anerem der Chambre de Commerce, der Fedil oder och nach der ULC gefouert ginn, iwwert d'Tabelle Nutri-Score. Wann et ee Konsens gëtt, kéint een Ufank vum nächste Joer ee Gesetzprojet hunn, dat sot d'Konsumenteschutzministesch Paulette Lenert. De Nutri-Score ass ee System, bei deem d'Nährwäerter op enger Etikett stinn. Ee Produit mat ville gesonde Wäerter ass gréng markéiert, déi manner gesond mat rout. Esou sollen d'Konsumenten op den éischte Bléck gesinn, wat si consomméieren. Datt de System elo och zu Lëtzebuerg agefouert soll ginn, léit och un der geographescher Lag vum Land.

Extrait Paulette Lenert

Dir fannt de Nutri-Score, schonn duerch de Fait, datt en an eise Nopeschlänner schonn Gesetzgebunge gëtt, déi e recommandéieren. Mir sinn ee klenge Maart. Déi meescht Produite ginn net hei am Land produzéiert. Dofir gesinn ech den Handlungsbedarf, well Lëtzebuerg wäert, ob mer wëllen oder net, confrontéiert ginn, mat deem Nutri-Score. Et ass wichteg, datt een ëm de Nutri-Score kommunizéieren. Hien ass net d'Äntwert op alles. Et huet laang gebraucht, ier ee sech duerchgesat huet.

Op europäeschem Niveau gëtt et keng Obligatioun, fir de Nutri-Score anzeféieren. Och op nationalem Niveau sinn d'Produzenten net gezwongen, fir en duerchzesetzen, mä kënnen dat op fräiwëlleger Basis maachen.

Invité vun der Redaktioun Paulette Lenert

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.