E Mëttwoch de Moie war de fréieren CSV-President eisen Invité vun der Redaktioun.

CSV ass an der Oppositioun ukomm an et gëtt just eng CSV, seet de Marc Spautz, fréiere President vun de Chrëschtlech-Sozialen. Hie war e Mëttwoch de Moien eisen Invité vun der Redaktioun.

D'CSV wier nach ëmmer eng Partei mat verschidde Stréimunge gewiescht. Och bei enger LSAP zum Beispill géif et verschidde Stréimunge ginn, mä do géif net direkt vu Gestreits geschwat ginn.

D'CSV hat jo virun der Summervakanz fir Opreegung gesuergt, well se dermadder gedreet huet déi nei Verfassung net matzestëmmen. D'Partei hat e Referendum iwwer wichteg Sujeten an d'Spill bruecht, dat als Reaktioun op e Bréif vum Premier Xavier Bettel, deen d'Pandora-Béchs nees hätt wëllen opmaachen. Datt d'CSV elo e Réckzéier géing gemaach ginn, gesäit de Marc Spautz net esou.

De Marc Spautz

Rezent Diskussioune ronderëm Feelverhalen oder eventuell Feelverhale vu Politiker hätten dofir gesuergt, datt d'Vertrauen an d'Politik gelidden hätt. Et géif vill méi zur Glafwierdegkeet bäidroen, wa sech den Ethik-Comité mat sou muncher Saach géing befaassen. Dat hätt méi Gewiicht, wéi wann de Premier Xavier Bettel einfach vun uewen erof seet, et wier näischt drun, fënnt de Marc Spautz.

De Marc Spautz proposéiert iwwerdeems an engem Pabeier, datt ee progressiv a Richtung Trennung vu Mandater soll goen. Et sollt een ufänke mat Changementer beim Congé politique.

Invité vun der Redaktioun: Marc Spautz

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.