E Méindeg de Moie war den Direkter vun der Chambre des métiers eisen Invité vun der Redaktioun.

9.400 Leit feelen dem Lëtzebuerger Handwierk, dowéinst muss ee méi wäit no Personal kucke goen. D'Groussregioun oder Portugal ginn do net méi duer. Dat sot den Tom Wirion, Direkter vun der Chambre des Métiers um Méindeg de Mueren am RTL-Interview.

Et gi vill Stellschrauwen un déi ee kann dréine goen, fir deem Manktem entgéint ze wierken. Bei de Frontaliere sinn dat Steieren, Securité Sociale a Mobilitéit, sou den Invité vun der Redaktioun. Et sinn also vill Ministèrë concernéiert.

An dowéinst wier en nationale Coordinateur néideg, fir eng Politik aus enger Hand, mengt den Tom Wirion vun der Handwierkerkummer.

De Moment géifen 30 Prozent Leit mat engem DAP, 10 Prozent Meeschterprüfungen a BTS, 26 Prozent net qualifizéiert Leit, an 22 Prozent CCPe gesicht ginn. De Schoulsystem fir déi momentan Situatioun responsabel maachen, dierft een allerdéngs net, esou den Tom Wirion.

"D'Formatioun kann een net gläichsetze mat de Problemer vum Personalmanktem, soss mécht een den Formatiounssystem "futti". De Formatiounssystem kann ee sécher verbesseren, do ass och vill geschitt ënnert dem Minister Claude Meisch, et muss een un der Orientatioun schaffen, datt déi besser un d'Besoine vun der Wirtschaft ugelehnt ass. Alles un der Formatioun auszemaachen, wier ze kuerz gegraff."

Grond fir de Personalmanktem ass de Wuesstem. Duerch deen ass och de Besoin un Handwierker geklommen. Et kommen der awer och net genuch an de Secteur, well se mengen e wier net attraktiv genuch.

Formatioun dann: Do ass scho vill geschitt, ma se kann awer nach verbessert ginn. Notamment muss d'Orientatioun besser un d'Besoine vun der Ekonomie ugepasst ginn.

Am Meeschte gi Leit mat engem DAP gesicht, awer och net qualifizéiert Leit, déi dann am Secteur kënnen ugeléiert ginn.

Invité vun der Redaktioun: Tom Wirion

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.