En Mëttwoch de Moie war de Serge Wilmes, Schäffe vun der Stad Lëtzebuerg, eisen Invité vun der Redaktioun.

An der Stad Lëtzebuerg ginn et ëmmer méi Geschäfter, a vill potentiell Clienten. Zuele géifen dat weisen. Dat huet de Stater CSV-Schäffe Serge Wilmes e Mëttwoch de Mueren am RTL-Interview ënnerstrach. 13 Prozent Geschäfter wiere bannent engem Joer dobäikomm, 6 méi an der Uewerstad a 7 Prozent op der Gare. An och an enger Etüd, déi elo just fäerdeg gestallt gouf, géif ee gesinn, datt den Trend positiv ass. All Zweeten an der Stad géif och Suen ausginn.

De Projet Hamilius wier e wichtege Projet, ee Magnéit, eng Lokomotiv fir de Stater Commerce. D'Leit wäerten net nëmmen do, mä och an de Stroosse ronderëm akafen. Wat de Leerstand vu Butteker ugeet, wier ee frou, datt d'Situatioun an der Stad net esou dramatesch wier wéi an anere Stied. 5 bis 6 Prozent stéingen eidel. Ma et géif een u Projete schaffen, fir déi Lokaler ze fëllen. Och Pop-Up-Stores sollen zum Beispill an der Philippesgaass an ee Geschäft Mëtt November kommen. Do hätt een d'Kontrakter rezent ënnerschriwwen, fir eng Entreprise, déi Kannerspillsaachen an Atelieren ubitt a fir eng Firma, déi op asiatesch Kleedung spezialiséiert ass.

Grouss Defie fir d'Geschäfter: D'Konkurrenz, déi méi grouss ginn ass, och duerch den Internet, an den Ament natierlech Schantercher, speziell op der Gare. Dat ass e Joerhonnertschantjen, sou de Serge Wilmes.

D'Accessibilitéit vun de Geschäfter wier awer garantéiert an och den ëffentlechen Transport géif reegelméisseg ugepasst ginn. Parkplazen hätt een och genuch. Hei kéinten d'Präisser awer nach gedréckt ginn.

An och wann et net d'Roll ass vun der Gemeng fir Commerçant ze spillen, sou géif een dach probéieren de klenge Geschäfter ze hëllefen, dat mat flotten Evenementer an Aktiounen. Et géif een de Kader setzen, sou nach de Serge Wilmes.

Invité vun der Redaktioun: Serge Wilmes

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.