E Mëttwoch de Moie war d'Affekotin an Expertin fir Familljerecht eis Invitée vun der Redaktioun.

Et gi vill Texter, ma et kann een ëmmer méi maachen. Wat feelt, ass awer eng global Kannerechtspolitik, mat den néidege Moyen, sou d'Deidre Du Bois am RTL-Interview. Si ass Affekotin an Expertin fir Familljerecht a Jugendschutz.

Positiv wier awer, datt Kanner elo keen "Objet de Droit" méi sinn, mä e "Sujet". Wëll heeschen: keng Saach méi, mä eng Persoun. Konkret géif sech dat schonn am neie Scheedungsgesetz weisen. Sou kënne Kanner elo bei enger Scheedung, froen, bei wiem si wëlle liewen. Et gëtt also net méi iwwert Kanner ewech, mä mat hinnen decidéiert.

D'Kanneraarmut war och e Sujet am Interview. Do géif och nees den deiere Logement eng Roll spillen. Speziell Kanner mat engem eenzelen Elterendeel lafen esou Gefor an d'Aarmut ze falen.

Plus/Minus 250 Euro Alimenter muss ee Partner deem anere bezuelen, deen d'Kanner en charge kritt. Hei géif d'Deidre Du Bois begréissen, wann e richtegen, méi prezise Barème géif ausgeschafft ginn, deen och dem soziale Statut vun den Elterendeeler méi géif Rechnung droen.

Den Text vum neie Jugendschutzgesetz net nëmmen nobesseren, mä e komplett neien Text ausschaffen. Dat fuerdert och d'Kanneraffekotin Deidre Du Bois.

D'Invité vun der Redaktioun begréisst, datt déi zoustänneg Ministesch och an déi Richtung géif goen.

Invité vun der Redaktioun: Deidre Du Bois

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.