E Freideg de Moie war de Generaldirekter vun der Stëftung "Hëllef Doheem" eisen Invité vun der Redaktioun.

Mir musse méi Leit astellen, engersäits fir datt och Personal am Noutfall disponibel ass, anerersäits fir en Nuetsservice z'assuréieren, dat sot e Freideg de Moien de Benoît Holzem, Generaldirekter vun der Stëftung Hëllef Doheem. Hie war eisen Invité vun der Redaktioun. Hëllef Doheem ass mat iwwer 1.900 Leit Personal a 17.000 Patienten de gréissten Hëllefs- a Fleegedéngscht an de 15. gréissten Employeur am Land.

Den Ament misste Mataarbechter aus der Fräizäit erëmkommen, wann een aneren am Krankeschäin wier - de Staat kéint do eng Surdottatioun vum Personal finanzéieren, fir dat z'evitéieren.

De Benoît Holzem bedauert e bëssen, datt 2017 am Kollektivvertrag primär d'Paien an d'Luucht gesat gouf. De Leit um Terrain hätt et méi bruecht, wa rekrutéiert gi wär, méi Personal do wär an d'Leit besser vun hirer Fräizäit kéinte profitéieren.

Fir d'Patiente wier et iwwerdeems wichteg, datt en Nuetsservice kéint assuréiert ginn. Et kéim een net derlaanscht fir och an der Nuecht bei Patienten heem ze fueren, seet de Generaldirekter vun der Stëftung Hëllef Doheem. Aktuell ass ee vu moies hallwer 7 bis owes 10 Auer ënnerwee, dat ënner schwierege Konditioune mat ëmmer méi Trafic a Stauen an an de Stied kenge Parkplazen.

Hëllef Doheem wëll elo e Pilotprojet maachen, e 24 Stonnen op 24 Service testen. De Sozialminister Romain Schneider géif sech oppe weise fir eng Diskussioun, wat eng méiglech Finanzéierung vun engem Nuetsservice ugeet, sou de Benoît Holzem.

Invité vun der Redaktioun: Benoît Holzem

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.