En Donneschdeg de Moie war de President-Direkter vun der CNS eisen Invité vun der Redaktioun.

Am Gesondheetswiesen entsprécht d’Nomenclature, d’Oplëschtung vun den Tariffer fir déi jeeweileg medezinesch Akten, net méi den aktuelle Besoinen. Dat sot de President an Direkter vun der Gesondheetskees CNS en Donneschdeg de Moien hei op RTL. De Christian Oberlé sot d’Nomenclature wier dat wichtegst "Steierungsinstrument" vun der CNS, mä dat Instrument wier am Moment "schlecht".

Trotz Stëllstand mat der Dokter- an Zänndokterassociatioun wier schonn un enger neier Nomenclature geschafft ginn an d'Aarbecht géing virugoen. Mat enger neier Nomenclature wier awer net an engem Joer ze rechnen, well dat "eppes ganz Komplizéiertes" wier. "Do hëlt ee Spezialitéit no Spezialitéit", sou de Christian Oberlé. D'nächst Joer kéinte puer Spezialitéiten awer schonn opgeschafft sinn, mä et wier "éischter e Projet vun 3 bis 4 Joer". D’Moderniséierung, dorënner och d’Aféiere vum "Remboursement immédiat", respektiv den "Tiers-payant nouvelle génération", géinge parallel lafen.

Wat d'Verbesserung vun de Leeschtungen an der Santé ugeet, déi déi lescht Jore schonn decidéiert goufen, déi géingen elo d'nächst Joer a Musek ëmgesat ginn. Net just d'Fleeg vun den Zänn géing op de Leescht geholl ginn, mä och d’Psychotherapie. Et wäert och eng nei Konventioun mat den Dokteren zur Sprooch kommen.

Visioun fir d'CNS

Mir spieren d' Erwaardunge vun de Professionellen an vun der Politik, datt mer eis misse moderniséieren a fir dësen Erwaardunge gerecht ze ginn, wëll een a verschiddene Beräicher usetzen: Sou soll den Assuré besser begleet ginn, mat méi Informatioun. Et soll verstäerkt op preventiv Medezin gesat ginn an den Austausch mat Professionellen an Assuréë soll verbessert ginn.

De Christian Oberlé ënnersträicht awer, datt fir d'Ëmsetze vun dëse Visiounen op déi ablécklech Mataarbechter gesat gëtt. Ma et ginn awer och nei Kompetenze gebraucht, notamment fir beim medezinesche Fortschrëtt kënne matzehalen.

Invité vun der Redaktioun: Christian Oberlé

Rendez-vous fir den Interview mam Invité vun der Redaktioun all Dag vu méindes bis donneschdes um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.